فٹبال جہان نا بھلا کھلاڑی وَ ارجنٹائن نا فٹبالر لیونل میسی پارے کہ فیفا ورلڈ کپ 2022 ئنا فائنل اونا کیریئر نا آخری ورلڈ کپ میچ مرو۔
جہانی میڈیا نا رد ئٹ اسہ انٹرویو ئسیٹی 35 سالی آ فٹبالر میسی نا پاننگ ءِ کہ یک شمبے نا دے مروکا ورلڈ کپ فائنل تینا ڈیہہ اَکن اونا گڈیکو گوازی مرو۔
یاتی مرے ارجنٹائن نا کپتان میسی کوارٹر فائنل ئٹی کروشیا نا بر خلاف فیفا ورلڈ کپ نا تینا پنچمی گول ءِ کرے و ایلو اِرا گول تیٹی کُمک تریسہ اہم ءُ کردار ئَس ادا کرے۔
میسی نا پاننگ اس کہ ای خوش اُٹ کہ کنا سفر میگا ایونٹ نا فائنل ئٹی ختم مننگ ءِ و دا اوڑکن شاتمانی نا ہیت ئسے۔
مشہور و بلا فٹبالر میسی نا پاننگ ءِ کہ مون ئنا ورلڈ کپ کن چار سال ئنا وخت ارے اودے لگیپک کہ بروکا ورلڈ کپ آ او گوازی کننگ کرو ۔ ورلڈ کپ نا ہندا وڑ ئٹ خلاس کننگ جوان ءِ۔
یاتی مرے کہ لیونل میسی تینا کیریئر نا ریکارڈ ئٹی 7 وار بیلن ڈی اور ایوارڈ و اسہ وار اس فیفا بیسٹ پلیئر ایوارڈ ءِ کھٹانے۔
اوفک چار وار چیمپئنز لیگ ٹرافی توںلن اوار 11 وار جتا جتا انگا ٹائٹلز و اسہ وار اس کوپا امریکا نا ٹرافی ءِ ہم کٹانے واہم ایوارڈ نا شیلف ئٹی ورلڈکپ ٹرافی ءِ اوار کننگ نا اومیت وارے۔
یاتی مرے کہ 18 دسمبر یک شمبے نا شام ارجنٹائن و فرانس فیفا ورلڈ کپ نا فائنل ءِ گوازی کرور۔
