بلوچستان نا بنجائی شار کوئٹہ ٹی یک شمبے نا دے سم کاری تا ارا جتا ءُ تدینی ٹی 2 نیاڑی تون اوار اسہ بندغ اس بیران مسونے۔
گیشتری حوال تا رد ئٹ جان محمد روڈ و قمبرانی روڈ آ سم کاری آن 2 نیاڑی تون اوار اسہ بندغ اس بیران مسونے۔
سم کاری نا اولی ویل جان محمد روڈ آ مونا بسونے ہراڑے سم کاری آن اسہ بندغ اس بیران مس۔ کہوک آ بندغ نا چاہنداری آزاد خان ولد بگو خان نا پنا مسونے۔
اندن سم کاری نا ارڑمیکع ویل قمبرانی روڈ آ مونا بس ہراڑے اُرا ٹی پترینگسہ سم کاری آن ارا نیاڑی ءِ خون کننگا۔
ایدھی جون آتے سول اسپتال آ دننگا ہراڑے المی کاروائی آن پد جون تے خاہوت آتا دوٹی ترور۔
پولیس نا رد ئٹ ویل اُرائی جیڑہ سے نا سوب آن مسونے، ڈوہ دار آتے بندی کننگ کن ٹیم جوڑ کننگانے۔
