توتک ئٹی دزگیری آن گڈ بیگواہ مروکا بندغ آک داسکان آجو نننگ کتنو۔ کیہی سال تیان خاہوت آک کسر ہروک ءُ عدالت و کمیٹیک انصاف کننگ کتور، دا پاننگ اس توتک آن زوراکی ئٹ بیگواہ مروک بزرگ محمد رحیم قلندرانی نا نواسہ نا ہرا دوانزدہ سال آن تینا بھلا باوہ و سیال آتا آجوئی نا انتظار ٹی ءِ۔
توتک ئٹ پاکستانی لشکر نا کنڈ آن 2011 ٹی لشکری آپریشن ءِ اینو دوانزدہ سال ایسر مسنو لشکر آپریشن نا وخت آ توتک آن کیہی بندغ آتے دزگیری آن گڈ زوراکی ئٹ بیگواہ کریسس و آپریشن نا وخت آ اِرا ورنا ہم کھسفیسس۔
توتک آپریشن ءِ 12 سال ایسر مننگ آ اینو بلوچ سوشل میڈیا ایکٹویسٹ “بی ایس ایم اے” نا کنڈ آن چاگڑدی حوالکاری میڈیا نا ویب سائٹ ٹوئٹر آ کیمپئن ہم اڈ تننگانے و تدوکا نن بیگواہ قلندرانی خاندان نا عزیر، صحافی و سیاسی باسک آتا ٹوئٹر اسپیس ہم اڈ تننگا۔
اندا وخت آ ہیت کریسہ بیگواہ محمد رحیم نا نواسہ ماہ نور بلوچ نا پاننگ اس کہ ننا بندغ آتا زوراکی نا بیگواہی تا برخلاف ہرا وخت عدالت و کمیشن آتا مونا ہنان تو اوفتے ریاستی ادارہ آتا کنڈ آن دڑکو تننگا اوفتے کیس آتے خارج و چُپ مننگ کن زور شاغنگا، غٹ کوشست و بیوسی تیان بیدس ننے کس بنتو و نئے ننے اینو اسکان ننا بندغ تا بارو ئٹ حوال تننگا۔
خیال مرے کہ خضدار ئٹی 18 فروری 2011 آ پاکستانی لشکر توتک نا خلق ءِ چارمہ کنڈ آن گھیرہ کریسہ اُرا اُرا ٹی پٹ ءَ پول کرے، کیہی ساعت اسکان برجاء سلوکا آپریشن ئٹی خلق ئنا غٹ نرینہ و نیاڑی تے اسہ جاگہ غا مُچ کریسہ لشکری کارندہ آک ارفتے بیم تسر و اوفتے بےڈس ءُ جاگہ سے آ دریر۔ پدان اوفتےان کیہی بندغ آتے آجو کریر ولے 82 سالہ محمد رحیم خان قلندرانی و اونا خاہوت نا اینو 16 بندغ آجو متور۔
