ریڈیو زْرمبش براہوئی | ریڈیو زْرمبش براہوئی,Iraq,three-members-of-kurdistan-workers-party-were-killed-in-a-drone-attack-

عراق نا کرد اکثریتی صوبہ کردستان ئٹی اسہ ڈرون جلہو ئسیٹی کردستان ورکرز پارٹی نا مُسہ کارکن خلنگانو و مُسٹ پین ٹپی ءُ۔

عراقی پولیس نا رد ئٹ اسہ ڈرون طیارہ ئس سلیمانیہ نا علاقہ ٹی اسہ زرعی ہوائی اڈہ سے آ کاؤنٹر ٹیررازم سروس نا اڈہ ئے ٹک کرے۔ بمباری ٹی سلیمانیہ شہر نا جاندم ئٹی ساڑی چُنکا عربت ہوائی اڈہ ئے ٹک کننگا، ہرا پرائیوٹ جہاز آتیکن پُھو خلوک دارو نا اسپرے کن کارمرز مسکہ۔

سلیمانیہ ٹی کالخواک اسہ بیان ئسیٹی پاریر کہ جلہو ئٹی ” پیشمرگہ” نا مُسہ کارکن کھسکنو و مُسٹ پین ٹپی ءِ۔

پیشمرگہ لشکر دادے دہشت گردی نا کارروائی ئس پارِسا دانا مذمت ئے کرے۔ بیان ئٹی پاننگانے کہ دا تدینی نا پٹ ءَ پول کننگو و معلومداری تے راز ئٹی تخِسا ڈوہدار آتے سزا تننگو۔

اسہ سکیورٹی زرائع ئس رائیٹرز ئے پارے کہ بنداوی معلومداری تیان پاش مریک کہ اسہ دنو ہدف ئسے آ جلہو ئٹی ترک ڈرون آک کارمرز مسنو ہرا نا تعلقداری کردستان ورکرز پارٹی آن ءِ۔