آئی کینڈی یا کینڈی گرل کنسیپٹ اسہ خطرناک او جاسوسی نا تیکنیک ئسے ارادے مخالف آ طاغت آتا یا گوریلہ جنگڑو آتا برخلاف اسہ سلاہ سینا دروشم ئٹ کاریم ئٹی ہتیرہ۔
ہرا نا تذکرہ " ہکل" میڈیا سیل ئنا کنڈ آن شینک مروکا بلوچ لبریشن آرمی نا کتاب "چیدہ " ٹی کننگانے دا حربہ ہنوگا وخت ئٹی بھاز انگا جہانی طاغت آتا برخلاف کاریم ئٹی ہتنگانے و داسکان ہم دا کاریم ئٹی ہتنگک۔
ولہ داڑے ای داسہ نا بلوچ تحریک نا مناسبت ئٹ بیان کننگ نا پورو کوشست ئے کروٹ آئی کینڈی اسہ زیبا او تولوکو مسڑ ئس مریک یعنی دا منصوبہ ٹی زیبا غا مسڑ تے کاریم ئٹی ہتیرہ۔ ارافتے اسہ جتا او وڑ ئسے ئٹ تربیت تننگک و او ریاست نا کنٹرول ئٹی مریرہ ۔ اوفتے بلوچ جہد ئتو تفوک نیاڑی تا طرز طریقہ مائنڈ سیٹ لہجہ و باڈی کیمسٹری ہیل تننگک۔ تانکہ او امکانی وڑ ئٹ زوت تینا ہدف نا خڑکی ئے دوئی کیر و اوفتا ماحول ئٹی جاگہ جوڑ کیر ۔ کینڈی گرل بلوچ آک ہم مننگ کیرہ و غیر بلوچ ہم ۔ اوفتا اہم انگا نشانہ غاک بلوچ خوانوک آک و شعور والا ورناک بلوچ سلاہ بند و سیاسی جہد ئتو تفوک سنگت آک مریرہ ۔ اوفتا کاریم کننگ نا طریقہ غاک جتا مریرہ ۔ جاگہہ ئس تعلیمی و سیاسی سرگرمی تیٹی بشخ ہلیسہ جاگہہ ئس برانز یا کیمپین آتیٹی تو جاگہہ ئس سوشل میڈیا نا جتا انگا پلیٹ فارم آتا ذریعہ ئٹ۔
اوفتے اسہ تیبہ او کور اسٹوری ئس دوئی مریک یعنی تینا باروٹ او غیر حقیقی او بائیو ڈیٹا تخرہ ۔ اراڑان اوفتا حقیقت نا اندازہ خلنگ مشکل مرے اوفتا اولی کوشست خڑکی کننگ نا مریک
تینا ہدف تو تعلق تخنگ جتا انگا ہند آتا ملنگ نا خواست کننگ اعتماد ئٹی ہلنگ نا کوشست کننگ کہ او اونا عشق ئٹی بندی مسنے ۔
تینا زند ئنا ہر ساعت ئے اوڑتو گدریفنگ خواہک ہر غم و خوئشی ٹی اونا حوصلہ مننگ خواہک اراتم او تینا اولی عمل ئٹی سرسہب مس تو اونا ارٹمی عمل معلومات ہلنگ نا مریک اراٹی ہدف نا نظریہ بروکا وخت ئنا سوچ سیاسی سرگرمیک راجی جنز ئتو تفوک مننگ یا وے مننگ متعلقہ راجی ادارہ یا تنظیم تول و بش و راجی جنز ئتو تفوک آ سنگت آتو تعلق اوار ئے ۔
اینو پھگہ دن کہ راجی جنز ئنا کارکن آتا جوان انگا حکمت عملی و گوریلا تربیت نا سوب آن دا اوفتے کن بھاز مشکل مسنے کہ او عملی وڑ ئٹ دا منصوبہ آ عمل درآمد کننگ کیر ۔ تو داسہ سوشل میڈیا نا جتا انگا پڑ آتے ترجیح تننگ او ارافتیٹی ٹوئٹر فیسبوک انسٹاگرام و ٹیلی گرام اوار او۔ داکان او اسہ کور اسٹوری ئس جوڑ کریسہ بلوچ سیاسی جہدکار نا وڑ ئٹ مونا بریرہ ۔ زیادہ تر ٹوئٹر کمپین آتیٹی یا فیسبوک آ سوشل میڈیا ایکٹیوسٹ نا دروشم ئٹی
دا اکاونٹ آک جعلی ہم مننگ کیرہ و اصلی ہم
یات مرے کہ دا بھازیکا ذاتی معلومات آتیٹی دلچسپی ہلیسہ مون آ بریرہ ۔ سوشل میڈیا غا بلوچ ورنا تیتو تعلق جوڑ کریسہ گیشتر او دا ڈیٹا تے ہلنگ نا کوشست ئے کیرہ
1 ذاتی چائنداری
2 علاقہ
3 تعلیم
4 تعلیمی ادارہ
5 متعلقہ سیاسی تنظیم
6 خاہوت نا باروٹ چائنداری
7 خاہوت نا اسہ فرد ئس ارا راجی جنز ئٹی تد ئے و اونا باروٹ چائنداری
8 خاہوت نا اسہ بندغ ئس بیگواہ ئے تو اونا ڈٹیل ئے ننے ایت اوڑکن نن توار ہرفون
(یاتی مرے کہ بیگواہ غا بندغ آتا آجوئی کن وائس فار بلوچ مسنگ پرسنز نا پن ئٹ اسہ بندغی حق آتا ادارہ ئس ساڑی ئے اراڑے بیگواہ غا بندغ آتا معلومات آتے تنظیم نا ذمہ دار آ انفارمیشن ڈیسک ئٹی اسہ پراسز ئسے آن گدریسہ شامل کیرہ )
اوفیٹی اسہ خاص او ہیت ئس دا مریک کہ مدامی جذباتی بیانیہ و جتا جتا آ ڈائیلاگ آتے استعمال کیرہ اوفتیٹی اکثریت ہموفتا ئے ارا غیر بلوچ او ارا تینا پن تیٹی بلوچ خلیرہ ۔ بھاز آک براہوئی و بلوچی ٹی لکھنگ و ہیت کننگ نا صلاحیت تخرہ و بھاز آک داڑان نا آشنا مریرہ یا براہوئی یا بلوچی نا منہ پنوکو جملہ کاریم ئٹی ہتیرہ و او زیادہ تر ذاتی معلومات ہلنگ نا کوشست کیرہ۔
سوشل میڈیا ایکٹیوسٹ آتے و سیاسی جہد کار آتے بھاز ہوشیار مروئی مرو ۔ ہچ بلوچ جہد کار ئس ذات پات نا بارو ئٹ ہچو سوج ئس کپک اوفتا ہر بحث فکر نظریہ و راجی فلسفہ اسکان محدود مریک اوفتا بیانیہ مدام باشعور و سنجیدہ مننگ نا گوائی ئے ایتک۔
