بلوچستان نا ضلع کیچ آن پاکستانی لشکر نا دو آن ورنا نا زوراکی نا بیگواہی نا بر خلاف خاہوت و ہندی مخلوق نا کنڈ آن سی پیک کسر برانز کریسہ بند کننگا ہراڑا اِستو پولیس جلہو کرے۔
دو بروک وڈیو ٹی خننگ مریک کہ بیگواہ زمان بلوچ نا آجوئی کن برانز کروکا تے برانز ءِ توننگ کن پاننگک ولے برانزیک ورنا نا آجوئی اسکان برانز کننگ نا پارہ۔ انداڑے برانز کروکا تا رہا ترند سُم کاری بناء کننگک وا ہم برانزیک تینا برانز ءِ برجاء تخرہ۔
خیال مرے کہ تدوکا دے آن بیگواہ زمان بلوچ نا خاہوت کیچ ہوشاپ نا ہند آ کسر آ ہڑاند بش کریسہ کسر ءِ ہن ءَ بر کن بند کریر۔
زمان بلوچ ءِ مُسہ دے مُست تربت آن پاکستانی لشکر دزگیر کریسہ تینتو دریسس ہراکان گڈ او پاش کننگتنے۔ ورنا نا زوراکی نا بیگواہی نا بارو ئٹ پریس کانفرنس کریسہ خاہوت نا پاننگ اس کہ زمان ولد سپاھان ہرا کہ کیچ ئنا علاقہ بالگتر نا ہندی سے، 10 فروری 2023 جمعہ نا دے تربت بازار آن زوراکی ئٹ بیگواہ کننگانے و داسکان اونا ہچو حوال رسینگتنے۔
خاہوت نا پاننگ اس کہ دا اولیکو وار اف کہ زمان ءِ زوراکی ئٹ بیگواہ کننگانے، داکان مُست ہم اودے و اونا ایلم ماجد بلوچ ءِ 9 جون 2020 آ سکیورٹی ادارہ آک زوراکی ئٹ بیگواہ کریسہ شش توہ بےدادی نا گواچی کریسہ گڈ سر ئٹ یکہ کریسر۔
خاہوت نا پاننگ اس کہ سکیورٹی ادارہ آک چرجوئی ئٹ ننا خاہوت ءِ بیم تننگ ءُ و ننا خاہوت نا بندغ آتے ٹارگٹ کننگ ءُ۔
