گریشہ: حوال تا رد ئٹ گریشہ نا ہند گواراست ئٹی سی پیک کسر نا بر خلاف بندغاک برانز کریسہ کسر ءِ بند کرینو، برانز کروکاتا زی آ پولیس جلہو کرینے و تڑی ہم تسونے۔
حوال تا رد ئٹ گواراست نا گنداری جل ئنا سی پیک کسر ءِ جوڑ کروکا شرکت ڈی بلوچ پُہل ئٹی چُنکو پیپ شاغانے و دا پیپ آک جل ئنا دیر ءِ کشنگ افس۔ ہندا سوب آن گواراست نا تیوہ میتگ ءِ دیر ملانے اُرا و جاگہ غاتے نسخان تننگ ءِ۔
گواراست نا بندغاک بیزار مسونو سی پیک کسر نا بر خلاف برانز کریسہ کسر ءِ بند کرینو۔ ڈی بلوچ شرکت و ہندی کوالخواہ تا بر خلاف نارہ خلکونو۔ پولیس نا بھلو کچ اس بسونے و برانز کروکاتے کسر ءِ یلا کننگ نا تڑی تسونے۔
بندغاک پاکستانی پولیس نا برانز کروکا تتون زوراکی ویڈیو و عکس کشانو کہ اوفتا بد آ کڑد مونا برے۔
ریڈیو زرمبش ءِ سر مروکا ویڈیو ٹی صاف خننگ مریک کہ پولیس بندغاتے ویڈیو و عکس ہلنگ کن ایلنگ اف۔ اسہ ورناس پائک کہ دا میڈیا نا وخت ءِ ننے دا حق ارے ای دا ویڈیو ءِ جوڑ کیو۔ ننے نُما دا زوراکیک مونا ہتنگ خوارہ۔ پین اسہ ویڈیو ئسیٹی ہندا خننگ مریک کہ جل میتگ ٹی سر مسونے و دُن جل آن بار تدینگ ءِ۔
ہندی بندغس ریڈیو زرمبش توں حوال کریسہ پارے کہ گواراست نا بندغاک اولی دے آن زاری کرینو کہ دا پہل برز جوڑ کننگ مرے اگاں نا دانا دیر تیوغہ میتگ ءِ ملیسہ تینتو درو و میتگ ءِ بھس کرو۔ ولے ڈی بلوچ نا شرکت تینا فائدہ ءِ ہرانے و بندغاتا ہیت آتے خف توتنے۔ اینو ہموفتا نابودی نا سوب آن بندغاتا باوہ پیرئی آ اُرا و ہنکین آک بھس مننگ ءُ۔ ننا ہند ئنا میر و معتبر اک بس گچینکاری نا وخت آ خننگ مریرا ولے بندغاتا جیڑآتے بننگ کن کس اف۔
او تینا ہیت آتا ایسر ئٹ پارے کہ دا ہم اللہ نا شُکرے کہ دا پر و ہار آک دے ئنا وخت آ مسونو و بندغاک تینا چُنا، بندغ، مال و ساہدار آتے بُرز انگا جاگہ غا تیا کشانو۔ اگہ دا شام ئسیٹی مروس گڑا باز جانی نسخان مسکہ و بندغاتے گیش مالی نسخان ہرفوئی تماکا۔
