بلوچ نیشنل موومنٹ نا تربیتی پروگرام آتا لڑ ’ فلاحی ریاست‘ نا سرحال ئٹ پروگرام ئس اڈ تننگا۔ پروگرام نا بست و بندی ذمہ واری تے بی این ایم نیدر لینڈز نا باسک کہور بلوچ ایسری تس و گچین کروک سرحال آ سینٹرل کمیٹی نا باسک فہیم بلوچ تینا خیال آتا درشانی ءِ کرے۔
فہیم بلوچ فلاحی ریاست نا تاریخی پَد ندارہ، دیمروی کن اونا اہمیت آ فائدہ و بی این ایم نا راہبند نا رد ئٹ اسہ فلاحی ریاست ئسے نا حیثیت ئٹ آخبت نا آزاد بلوچستان نا تصور آ رژنائی شاغا۔
فہیم بلوچ نا پاننگ اس کہ دا وخت آ جہان ئٹ بیرہ بیست ئنا کچ ڈیہہ اندنو ارے ہرا فلاحی ریاست نا تعریف آ پورو تمِرہ۔ اوفتیان گیشتر کچ یورپی ڈیہہ تا ءِ۔
او پارے کہ پوسکنا وخت ئٹی نن فلاحی ریاست نا خواست ئنا اندازہ دا ہیت آن کننگ کینہ کہ اینو نیامکو قطب نا ڈیہک ہم فلاحی ریاست نا کنڈ آ گام خلنگ ءُ۔ اوفتا کوشست ءِ کہ تینا ریاست آتے فلاحی ریاست آتیٹ مٹ کیر تانکہ السی و ریاستی ویل آتا ایسری ٹی ہڑاند مونا بف۔ دا راستوکی نظر آن ڈھکنگ مفک کہ ہرا ریاست آتیٹ الس ءِ رکھ و آسراتی دوئی مریک یا اوفتا ویل آک ایسر کننگرہ او چاگڑد آک دیمروی کیرہ۔ دیمروی بیرہ فلاحی ریاست آتا ذریعت ئٹ منکن ءِ، داڑان چپ چاگڑد ئٹ انتشار ودی مریک۔ غیر فلاحی ریاست آتیٹ الس ءِ دیوال ئٹ خلنگک و اوڑے دیمروی مننگ کپک۔
فہیم بلوچ پارے کہ بی این ایم بلوچستان ءِ اسہ فلاحی ریاست ئس جوڑنگ خواہک۔ پارٹی ٹی ویلفیئر سیکریٹری نا گچین کننگ و ویلفیئر ڈیپارٹمنٹ نا اڈ تننگ دا ہیت ئنا پاش کننگ ءِ کہ پارٹی تینا آخبت نا پروگرام تیکن تیبہ تیار ءِ۔
ایسر ئٹ او پارے کہ بلوچ چاگڑد ہم تینے آن اسہ فلاحی چاگڑد ئسے۔ داڑان بیدس کہ کوزہ گیر آک تدوکا اسہ سد و ہشتاد سال ئٹی ننا چاگڑد ئٹی اقدار ءِ جشانو ولے واہم ننا دود و ربیدہ ٹی باز اندنو گڑا ارے ہرا فلاحی ریاست نا تصور تون گھنڈوک ءُ۔ داڑان ننے تینا آخبت نا فلاحی ریاست ءِ جوڑ کننگ ئٹی اڑزانی مرو۔
