بندغی حق آتا باسک و پنی آ وکیل ایمان زنیب مزاری چاگڑدی حوالکاری نا ویب سائٹ ٹوئیٹر آ بلوچ زالبول نا دزگیری آ ردعمل تریسہ لکھا کہ آصف غفور اسل ٹی بلوچ آجوئی خواہوک تنظیم آتا کچ ءِ ودفنگ نا کوشست کننگ ءِ۔
او پارے کہ زالبول ءِ ہامدیکا ٹک کننگ پاکستانی لشکر و انٹیلی جنس ایجنسی تے کبین تمو، بیرہ اوفتے نہ بلکہ ننے کُل ءِ، ہرا وڑ بنگلہ دیش ئٹ ہراڑے ننا لشکر ریپ ءِ “ویپن آف وار” نا ڈول کارمرز کرے۔
ایمان پارے کہ ننا کاٹم اینو ہم دا جنگی ڈوہداری نا سوب آن شیف ءِ۔ شہنشاہِ اعظم جناب جنرل غفور صاحب بلوچستان ئٹ بلوچ زالبول ماہل ءِ دزگیر کریسہ اونا برخلاف جعلی ایف آئی آر درج کریسہ اَرا سٹریٹجک ہدف ءِ دوئی کننگ نا کوشست کننگ ءِ؟
او پارے کہ ہرا اسہ اسٹیج ئسے آ یا تو واپس ہلنگو یا منسوخ کننگو۔ نن دا مُست ہم خنان کہ پرامن باسک، خوانندہ، زالبول و بزرگ آتے چنکا چنکا کیس آتیٹ پھسیفنگ آن بلوچ الس ئٹ پاکستان نا برخلاف پین خار ودی مریک۔
ایمان زنیب پارے کہ اگہ تنازعہ ٹی ترندی ودی کننگ مسخت ءِ ہرادے پاش وڑ ئٹ لشکر دوئی کننگ خواہک، تو غفور صاحب نا کور کمانڈر کوئٹہ نا عہدہ نا رد ئٹ او دادے پین ترندی ئٹ انجام تننگ کیک۔ اودے ہرا گڑا نا احساس اف او دادے کہ زالبول نا برخلاف اوفتا چم آتا بھرم 1971 ٹی “فتح” نا دروشم ئٹ پیشتمتو و اینو ہم بھرم جتا مفرو۔
