آواران نا ٹاک دے نیمروچ، آسمان نا مونا جھمر نا اسہ اسہ شینک سمندر ئٹ مچھی نا ڈول تار کننگ ئسر۔ باسُنی نا ہُب ئٹی ہر کنڈ آ زیست ئنا چُپی تالان ئس۔ بیست یا بیست و دو اُرا غا ساڑی چنکو خلق اس، غٹ دا وختا تینا اُرا تیٹ زند ئنا سختی و سوری تتون آختہ ئسر۔ خلق آن زرس مُستی مُلک آ تیٹ بزغر آک تینا کاریم تیٹ آختہ ئسر۔ خلق ئٹ اسہ کوٹی آ ساڑی پرائمری سکول اس ہم ئس ہرانا اسہ ماشٹر اس ئس و آخریکو کلاس ءِ چُھٹی تریسہ او ہم تینا خلق آ روان مسس۔
لمّہ ماہ جان تینا کوٹی نا باء آ تولوک ئس۔ دو ٹی کشیدہ خن تیا ہولُن ءُ چشمک اس و خُش آن تہ کشیدہ نا دسک آک تالان ئسر۔ کوٹی ٹی بَڑزی سے آ جھوکہ ہانی نا دو ٹی کتاب اس ئس و باز خوڑتی ئٹ کتاب ءِ خواننگ ئس۔ ہانی پنچمی کلاس ئٹ خواناکہ و تینا کلاس نا لائخ آ چُنا ئس۔
دے پوسکُن ہڑسینگ ئس تینے و کوٹی نا مونا چنکو اڈ اس ئس ہراڑے درو نا ودی مروکا دغر تینا لمّہ نا خُش آن خاچوک ئس۔ ایلو مال تے کُھریا خوافنگ کن دریسس۔ خلق ئنا گیشتری مالک یا تو اندن یلہ ئسر یا کھُریا خوافنگ کن دریکہ و شام نماز نا وختا ہیسکہ تا۔
زیست ئنا چُپی ءِ پرغِسہ موٹر سائکل ئسے نا توار مس، اندن گمان مسکہ موٹر سائکل لمّہ ماہ جان نا اُرانا نیمہ غا بننگ ءِ، ہانی کتاب ءِ تخیسہ زو زو بش مس کہ اُرے دیر بننگ ءِ۔ ہانی درغ آ سلیسہ پیشن اُرا، موٹر سائکل خُڑک کریسس و موٹر سائکل آ دودا ئس۔ ہانی نا چہرہ نا تاثر آک اسہ دم بدل مسُر۔ و گُڑینگوکا توار تون لمّہ ءِ پارے “ لمّہ ایلم دودا ءِ”۔ ضعیف آ چہرہ غا پیری نا کوسک ایہُن ئسر وا دا حوال آن پیشانی آ کوسک گیشتر مسر۔ اُست نا درپہ غا اسہ وار بے ڈول شیف بڑز مسر ولے ہچ پاتو۔ ہانی انگہ ہُننگ ئس کہ لمّہ امر کیک ولے لہجہ ٹی ہچ وڑ ئنا سختی ہتنگ آن بیدس لمّہ ہانی ءِ پارے “ہِن مُہہ آ تہ و ہیمون نا کوٹی ٹی در تہ، حوال کر تہ انتئے بسونے، اودے ای پاریسُٹ کنا زندی ٹی دا اُراغا مون کپ؟”
“ ننا خننگ کن بروئے لمّہ، مگہ نا اُست پاپک تینا چُنا ءِ خننگ کن، مگہ نی زہیری افیس ایلم کن؟ ” ہانی نا خنک غُل غُل کریر۔
“ ای پارینُٹ اودے ای اونا لمّہ افٹ او کنا مار اف۔ ہن پار تہ کائے داکان۔ کنا اُرا ٹی اوڑکن جاگہ اف، او کنا اُرا نا پارہ غا مون کپ ” لمّہ کشیدہ ءِ لوتھ ئٹ شاغسہ بش مس۔ نظر نا چشمک ءِ خن تیان دڑفے و برونک آ تخا وا بس تینا جاگہ غا توس۔ او تینا لمئی آ مہر ءِ امر اُست ئٹ کھڈ کریسس ہانی اسُل سرپند مننگ الو۔
لمّہ و ہانی ہیت کننگ ئسر کہ موٹر سائکل سر مس و ایمون نا کوٹی نا مونا سلیس۔ ہانی گُد ءِ جوڑ کرسہ دودا نا مونا ہِنا، دودا ءِ بخیر کرسہ کوٹی ٹی تولنگ نا پارے۔ دودا چُنکا ہیڑ ئنا کاٹُم آ مہر ئٹ دو ءِ تخیسہ سوج کرے “لمّہ اندا کوٹی ٹی ءِ؟” ہانی مون ءِ شیف کرے و سرغ ئٹ آخہ ٹی ورندی تس۔ دودا پوہ مس کہ لمّہ ایلو کوٹی ٹی مرو و دا ہم پوہ مس کہ لمّہ اودے بخیر کننگ خواہپک۔ دودا ہمو کوٹی نا نیمہ غا مون کرے ہراڑے لمّہ ئس ولے ہانی توار کرے “لمّہ پارے کہ نی واپس ہِن ایلم، او نے خننگ خواہپک، لمّہ نا لمئی آ مہر نے کن ایسر مسونے؟” ہانی نا توار کبین مس کس پائے تینا خڑینک آتے زور ئٹ توننگ ئس ولے دودا پدی چک خلتو ہانی ءِ ہُرتو۔
کوٹی نا باہ آ دودا سلیس ولے تہٹی ہنتو، لمّہ بَڑزی آ جھوکہ خلوک تولوک ئس، “مگہ اندن ارزانی ئٹ لمّہ و چنا نا رشتہ ایسر مریک؟ نی کنے تینا مار کپہ تینا اُرا ٹی جاگہ تفہ ولے ای داخس وخت آن پد بسونُٹ کنے انداخس موکل ایت کہ ای جَھٹ اس نا رہا تولو، نتّا باسُن آ کنے واپس ہننگ نا پاسہ لمّہ؟“
“ گواچنی دن ارزانی ئٹ لمّہ و چنا نا رشتہ ایسر مفک۔ نی کنا چنا اُس، دا گواچنی ءِ قدرت ہم مٹ کننگ کپک۔ ای نے نوہ تو پڈ ئٹ تخانُٹ، تینا بدن نا دتر تسونُٹ و ودی کرینُٹ۔ ہمر کہ کنا ایلو چناک کنے دوست ءُ نی ہم کنے دوست اُس۔ ولے دودا، نا کسر کنے و نے اسٹ ایلو آن باز مُر کرینے و دا ہیت ءِ نی ہم چاسہ۔ نی وختس لکھ مرادی آ لمئی ڈغار نا مننگ کپیسہ گُڑا نی کنا امر مننگ کیسہ۔ سال تا پند کنا و نا نیام ئٹ ارے و نے ہم سما ءِ دُن ارزانی ئٹ نی دا پند ءِ ایسر کننگ کپیسہ۔” لمّہ تینا اُست ءِ سوگو کرسہ ہانی نا خڑینکی خن تیٹ ہُرا، ہرا ڈن آ سلوک لمّہ نا ہیت آتے بِننگ ئس۔ ہانی نا خڑینک آک اونا اُست ءِ کپ کننگ ئسر ولے لمّہ تینے ڈڈ توریسوس۔
“ لمّہ نا اُست اندن سخت مسونے کہ تینا حقی آ مار آن ہم مونے ہڑسانُس؟ ” ہانی دودا نا پد ئٹ سلوک ئس و ہزار ارمان ئٹ لمّہ غان سوج کننگ ئس۔ دودا لمّہ نا دا ہیت آتے کہی وار بنگوسس اودے اینو ہم لمّہ آن اندا ہیت آتا اومیت ئس، اندا سوب آن او چُپ سلیسس۔
“ ہئو کنا اُست سخت ءِ و تینا ہم اُست ءِ بھلن کہ۔ اگہ ای دا ہیت آن شرمندہ اُٹ کہ کنا پڈ آن وطن نا غدار اس ودی مسونے تو دا ہیت کنا مون ءِ بڑزا کننگ کن بس ءِ کہ کنا پڈ آن وطن نا اِرا فرزند و وطن نا رکھوک ہم ودی مسُنو۔ دودا وطن نا غدار مس دا ہیت کنا اُست ءِ کپ کیک، ای نن تیٹ پھُر انگا تُغ آن سما کیوہ و اندا جیڑوہ کہ دودا امر دُن مس، کنا دتر اس دنو الو، کنا پال٘ اس دنو الو گُڑا اخر انتئے دودا لغور مس۔ ولے کنا اُست مطمئین مریک وختس ای دا جیڑوہ کہ کنا ایلو مل٘، شازیب وطن نا رکھ ءِ کننگ ءِ و زباد جان وطن کن شہید مسنے، دا ہیت کنا مون ءِ بڑزا کیک۔ دودا ٹی اگہ دنو جغر الو کہ او وطن نا رکھ کن توفک ہرفیکہ تو کم اس کم چُپ کریکہ اُرا ٹی توسکہ ولے او انداخس لغور مس کہ ہنا تینا ایلم نا خونی تتون ہم کوپہ مس، وطن غدار مس۔ نی ہم تینے آ فخر کر کہ نی شازیب و زباد جان نا ہیڑ اُس۔”
“ کنا کسر اخس رد مرے، ای اخس کہ خراب مریو ولے ای نا مار اُٹ نی کنا لمّہ اُس، نی امر کنے ٹی و شازیب و زباد جان ٹی فرخ کننگ کیسہ، بیرہ دا خاطر آن کہ ننا کسر آک اسٹ افس؟ اسہ لمّہ اس امر تینا چنا تیٹی فرخ کننگ کیک؟ نا مہر آ کنا ہموخس حق ارے اخس شازیب و زباد جان نا ارے” دودا انگہ درغ آ سلوک ئس۔ لمّہ اودے انداخس صلہ خلتوکہ کہ او کوٹی ٹی برے تولے۔
“ لمّہ چنا تیٹ فرخ کپک، غٹ چُنا تیکن اونا اُست ئٹ اسہ وڑ مہر مریک، ولے نی امر دُنو اومیت کننگ کیسہ کہ ای وطن نا غدار و وطن نا فرزند آ تیٹ فرخ کپر؟ امر دنو اومیت کننگ کیسہ کہ ای حق و باطل ئٹ فرخ کپر؟ زباد جان نا خونی تتون تولوک اوفتیان زر کنوک و زباد جان ہرا کہ ڈغار کن ندر مس، امر فرخ کپر ای نمے ٹی۔ نی تو ڈغار کن ندر مننگ مُر تینا ایلم نا ہم دتر ءِ اِرا روپئی کن بہا کریس۔ ” سال ئسے آن گڈ او دودا ءِ خننگ ئس و اودے دنو ہیت کننگ ئس۔ لمّہ نا اُست آن دا وختا پاک انگا رب آن بیدس کس ءِ ہم سما الو۔ اسہ لمّہ اس امر لمّہ وطن کن تینا دتر تون مون پہ مون مریک دا گڑا نا گمان ہم بھازی آن کس ءِ مفرو۔
“ زباد جان نا خونی اسہ بندغ اس اف اسہ ریاست ئسے لمّہ، و کسس اسہ ریاست ئسے آن امر بیر ہلنگ کیک؟” دودا اسُل پوہ مننگ الو کہ او لمّہ ءِ انت پائے کہ لمّہ نا اُست خلکن مرے۔
ولے لمّہ اسُل اُست ءِ خل کریسس و المّی اس کہ او تینا اُست ءِ خل کریکہ۔ “ اندا تو ننا بد بختی ءِ کہ خونی اگہ نزور اس مرے اوڑان نن ہفت پشت اسکان ہم بیر ہلینہ، ولے اگہ خونی ڈن آن بروکو ظالم، قوضہ گیر ءُ ریاست اس و تاغت ور اس مرے نن اودے اندن ارزانی ئٹ بشخنہ کہ او تاغت ور ءِ اوڑا ننا وس چلپک و اوڑا ننا ایلم، ایڑ، لمّہ و چنا تا خون معاف ءِ؟
دودا دا غٹ ہیت آتے اولیکو وار بِننگ الو، ہمو وخت آن کہ او دژمن نا ہم کوپہ جوڑ مسس لمّہ اوڑان مون ءِ ہڑساسس و دا لمّہ کن ہم ارزان الو ولے او دژمن آن زر کنوک ئسے نا حوصلہ ءِ بڑز کننگ کتوکہ۔ دودا سال ئسے آن گڈ اندا سرپند مریسہ بسوسس کہ نوا لمّہ نا اُست خُلکن مرے ولے لمّہ نا اُست ہمو وڑ سخت ئس اوڑکن۔
دودا بے اومیت مرسہ پدی مس و اسہ وار پدا ہانی نا کاٹُم آ دو ءِ تخیسہ اودے مہر تس، و تینا موٹر سائکل آ سوار مرسہ تینا بے اومیتی تون روان مس۔ لمّہ مُدامی نا ڈول اینو ہم دو تے بڑز کریسہ خُدا آن دعا کرے کہ او دودا ءِ حق ئنا کسر آ بننگ نا ہمت ایتے، و اگہ دُن متو اونا مرگ اونا جند ئنا ایلم تا دو آن مرو و دودا مُدامی کن اسہ غدار اس پاننگو۔ لمّہ کن دا دڑد ءِ سگنگ ارزان مفرو کہ اونا مل٘ اسہ غدار ئسے نا پن ئٹ چاننگے و اسہ غدار ئسے نا موت ئٹ کہے۔
ہانی نا خن تیٹ کہی سوج آک ئسر ہرافتے لمّہ خننگ ئس، اونا سن داخس الو کہ او دا غٹ گڑا تے پوہ مسکہ، ولے او داخس وخت ئٹ دا پوہ مسوسس کہ لمّہ نا مہر لمّہ ڈغار کن ءِ و لمّہ نا مہر لمّہ ڈغار نا رکھوک آ مل٘ آ تیکن چائے او اونا پڈ آن ودی مفس ہم، لمّہ نا مہر ہچ بر لمّہ ڈغار نا غدار آ تیکن اف، چائے او اونا پڈ آن ودی مرے۔
