بلوچ آجوئی دوست رہنما و بلوچستان لبریشن فرنٹ نا سربراہ ڈاکٹر اللہ نظر بلوچ تینا مائیکرو بلاگنگ ویب سائٹ ٹوئٹر آ پاکستان ئٹی مروکا عمران خان و فوجی اسٹیبلشمنٹ نا نیام ئٹی ساڑی آ حالیت آ تینا منہ سلسلہ وار آ ٹویٹ آتیٹی پارے کہ لاہور ئٹی فوج ئنا سُمکاری وے کننگ بلوچ کِن اسہ واضع ءُ کلہو ئسے ۔
او پارے کہ مارچ 2005 ٹی ، فوج ڈیرہ بگٹی آ بمباری کرے ، ارانا سوب آن 70 آن زیات بلوچ خلنگا، مسجد ، گوردوارہ و ایلو مزہبی جاہ تے تباہ کرے ، ننا میتگ میہی ٹی ہم بمباری کننگا و قرآن مجید آتے شہید کننگا ۔
مُستی پارے کہ دا چھاپہ نا وخت آ کنا ایڑتے مسجد نا تہان گرفتار کننگا اراڑے کہ او پناہ ہلکُسُر ، فوج بوٹ آتون مسجد ئٹی پیہا ۔ بلوچستان ئٹی بھاز میتگ و مش تیٹی اُراتے ہُشنگ و بِٹنگا ۔ داڑان بیدس لاہور ئٹی کور کمانڈر میجر آتا سُمکاری وے کننگ آن انکار کرے ۔
فوج ئنا سُمکاری وے کننگ بلوچ کِن اسہ واضع ءُ کلہو ئسے ، انتظامی فوج پاکستان آن ننا تعلق آتے مہان ہم منقطع کرینے ، ولے ای حیران اُٹ کہ بیرہ پنی آ بلوچ پارلیمانی پارٹیک انتے دسکا فوج ئتون ہمراہ ءُ ۔
بلوچ رہبر پارے کہ ڈنی راجی برادری تا معیار بلکل واضع ئے کہ او بیرہ پاکستان نا ایٹمی سلاہ تا سوب آن بلیک میل مننگ ءُ۔
