بلوچ آجوئی دوست آ رہنما ڈاکٹر اللہ نظر بلوچ سماجی رابطہ نا ویب سائٹ ٹوئٹر آ ٹویٹ ئسے ٹی پارے کہ بلوچ راج آن خواست ئے کہ بلوچ راجی آجوئی جنز ئٹ اوار مریر ،پارلیمنٹ نا بشخ جوڑ مفس ۔
او پارے کہ پنجاب پورہ پاکستان آ قوضہ گیر ئے۔ عدالت آک ، پارلیمنٹ و سلاہ بند آ لشکراک پنجابی قوضہ گیر نا خذمت ئے کننگ ءُ۔ اراوخت ہیت پنجاب نا بریک تو سپریم کورٹ بے اختیار مریک ، ولہ اراوخت کہ ہیت بلوچ ، سندھی ، و پشتون آتا بریک تو عدلیہ ،پارلیمنٹ و لشکر تینا نقطہ نظر ئٹ اسٹ مریرہ ۔
اونا پاننگ اسک کہ مُہان نا وزیر اعظم نواز شریف چین پاکستان اکنامک کوریڈور آ دستخط کننگ آن پد ہم بلوچ پارلیمنٹیریئنز آک بے وس ءُ۔ ڈاکٹر مالک بلوچ تینٹ اعتراف کرے کہ سی پیک نا 93 فیصد چین و 7 فیصد پنجاب آ کائک ، اختر جان نا زوت ئنا درشان ئٹی پاننگا کہ پنجاب انت خوائک ۔
او پارے کہ ریاست نا جتا انگا ادارہ آک اسہ جہہ آ مریسہ بلوچ لس مخلوق ئے ہندا احساس ئے تِسُر کہ پارلیمانی سیاست غیر موثر ئے ۔
بلوچ رہنما پارے کہ ای بلوچ نوجوان تے آن خواست کیوہ کہ او پارلیمنٹ نا شرمناک آ سیاسی طرز عمل نا بشخ جوڑ مفس ، دانا بدل آن نن تینا راجی تاریخی جنز آجوئی ٹی اوار مرین ۔
او مُستی پارے کہ تاریخی ریکارڈ ئے درست کننگ ضروری ئے، کہ اگست 1988 آن مھالو بلوچ جُنز ئنا نعرہ آجوئی اسک ، پدا اودے بدل کننگا و بھاز بندغ نا نیمہ غان خودغرضانہ مقاصد کِن پرغنگ مس ۔
