شال: مبارک قاضی نا پنجاہ سال ئنا شاعری نا سفر بلوچ نا رنگ ئتون خُلوک اسّ ہندا سوب آن اینو اونا جہان آن ہِننگ آن بلوچ راج سوگ ئٹی ئے ۔
دا ہیت آتے بلوچ نیشنل موومنٹ نا پروگرام ئسیٹی پارٹی نا چیرمین ڈاکٹر نسیم بلوچ کرے۔
پارٹی نا سینئیر جوائنٹ سیکریٹری جنرل کمال بلوچ نا اڈ تروکا پروگرام نا بناہ مبارک قاضی نا احترام ئٹی اِرا منٹ ئنا بے تواری آن مَس۔ بی این ایم نا ممبر آک و کابینہ نا ذمہ وار آک مبارک قاضی نا کڑد و اونا ادبی کاریم تیکن اودے خراج تحسین و خراج عقیدت ندر کریر۔
ڈاکٹر نسیم پارے کہ ہشتاد نا دہق آن ہلیس اینو نا دے اِسکان ، مبارک قاضی نا پنجاہ سال ئنا شاعری نا سفر ئٹی اونا شاعری انقلاب ، مزاحمت و بلوچ نا رنگ ئٹی خُلّوک اسّ۔ قاضی بندغ آتون تفوک اسّ ہرا تینٹ راجی سیاست ئٹی تُد اسُّر، تینا بلوچ دوستی و مزاحمتی شاعری کن زندان تیٹی تشدد سگا۔ اونا راجی ئتون اواری نا اسہ نشانی ئس اونا بے مثل انگا مار ڈاکٹر کمبر قاضی ءِ کہ او ہم مزاحمت نا کسر ءِ ہلک و شاعری ہم کرے۔اودے مبارک قاضی نا نیمہ آن تعلیم، تربیت و حوصلہ افزائی رسنیگاسَس۔دا ہم قاضی نا بلوچ تون اواری نا اسہ بھلو مثال ئسے۔
او پارے کہ اینو سوشل میڈیا نا زمانہ ءِ ، نن خننگ ئٹی اُن کہ بلوچ آک قاضی نا کذیت آن اخس دردی ءُ۔ ہمو قاضی کہ باز آ کڑدار آتا خواجہ اسک ، ہموکہ تینا ہیت ءِ مون پہ مون پاریکہ۔او ہر وخت تینا ہیت ءِ بیدس خلیسن آن جوزہ ئٹ کریکہ۔ کس ئسے نا پروا کننگ ، دروغ تڑنگ و غیبت کننگ قاضی آن بھاز مُر ئس۔اونا ہندا جوانی و صفت آتا سوب آن بلوچ راج اودے دوست تخاکہ۔ ایلو نیمہ آن منہ بندغ پاریکہ اودے ہر وخت شراب دوٹی ئے ولے اونا دا کاریم ئے اونا جوان اِنگا کاریمک ڈھکار بس او اسہ نمیران ءُ بلوچ دوست، راجی رہشون و راجی شاعر ئسینا پن ئٹ سلیس ۔
بی این ایم نا چیرمین مبارک قاضی تون مہر و مابت نا مثال ءِ ترِسا پارے اینو نُم خنارے پسنی ٹی انجمن تاجران اونا احترام کِن تینا دکان آتے بند کریر ، دا کاریم تیبہ بلوچستان ئٹی مروئی اَسک۔ زندگی نا ہر بشخ ئتو تفوکا بندغ آک اونا کذیت آن مونجھا ءُ۔مبارک قاضی نا عظیم اِنگا کڑدار نا سوب آن اودے مُدامی یات تخنگو ہندُن کہ اینو اودے ہرا مہر و مابت ئٹ یات کننگو۔
