بی این ایم نا مرکزی سیکریٹری جنرل دلمراد بلوچی زبان نا بھلا شاعر مبارک قاضی نا بارَو ئٹ پارے کہ قاضی تینا دور ئنا صوفی اسک۔
او پارے کہ قاضی پنی آ رسم و رواج آتے لتاڑِسہ تینکن کسر ئس کشا۔ ظاہری دروشم ئٹ بوتل ئس دوٹی اسہ ملنگ، فقیر ئس ہرا دین و جہان آن بے سماء ئس ولے تہٹی اونا خاخر ئس کہ مُدامی لگّاکہ۔ وختس ہندا خاخر پیشن بسکہ او جہانی لوز (شعر) مسکہ ہرافک اُست ئٹی نقش مسُرہ و وطن زاد آک اوفتے یات کریرہ۔
دلمراد بلوچ پارے کہ وطن نا دیوانہ ہر دشمنی ءِ مون تس، سیاسی، مذہبی، چاگڑدی، سرداری کس ئسے نا خاطر کتوکہ۔
گڈیکو ساہ اسکان مورچہ ٹی جنگ کروکا قاضی اینو ننا نیام ئٹی اف ولے ہرا وخت اسکان زمین نا زی آ بلوچ ارے، قاضی نا شاعری جنگ کرسا کرو۔
او پارے کہ بندغ آک پارہ بلوچ آک مردہ پرست ءُ ولے قاضی نا رد ئٹ دا ہیت غلط ثابت مس انتئے کہ بلوچ قاضی ءِ اونا زند ئٹی ہمو عزت و جاگہ ءِ تس ہرا جاگہ ءِ ہلنگ کن غالب نا وڑ اِنگا شاعر آتے سد آ سال آک لگار۔
