بلوچستان نا بنجائی شار کوئٹہ نا سول اسپتال ئٹی دا وخت 9 بندغ نا جون آک تخوکو، لشکر نا رد ئٹ اوفتے زیارت ئٹی لشکر تون اوار مقابلہ ٹی خلکونے داسکان بلوچ ہند آتیٹ لشکر نا دا پاننگ ئے اسہ دروغ او بیان ئس پاننگانے۔
بلوچ ہند آتا رد ئٹ خلنگوک آک کھل بیگواہ مروک آ بندغ آکو ہرافتے لشکر دروغی مقابلہ ٹی قتل کریسہ اوفتے سرمچار نشان تننگ ئے۔
لشکر کوالخواہ آتا پاننگ ئے کہ زیارت ئٹی بی ایل اے نا برخلاف آپریشن نا وخت سم کاری تا بدل کننگ ئٹ دا بندغ آک خلنگار۔
زیارت و ہیب کھیب آتیٹی لشکری آپریشن نا بنا ہمو وخت آ کننگا ہرا وخت 12 و 13 جولائی نا نن لیفٹیننٹ کرنل لئیق مرزا ہرا ڈی ایچ اے کوئٹہ ئٹی تعین اس و اونا کزن عمر ئے سلاہ بند بندغ آک کسر ئے بند کریسہ چاہنداری آن پد تینتون اوار دریسور۔
برمتہ مروک آ کرنل نا اغوا و خلنگ نا ذمہ واری ئے بلوچ لبریشن آرمی ہرفیسس۔ بیان ئٹی گل نا جارکش جیئند بلوچ پارے کہ پاکستان نا کرنل لئیق ئے مرگ ئنا سزا تننگانے۔
بی ایل اے نا جارکش جیئند بلوچ تینا بیان ئٹی پاریس کہ کرنل لئیق ئے بی ایل اے نا اسپیشل ٹیکٹیکل آپریشنز اسکواڈ اسہ انٹیلیجنس آپریشن ئسے نا وخت 12 جولائی آ دزگیر کریسس۔ اندن کرنل لئیق نا جون زیارت آن خننگانے
پاکستان لشکر نا شعبہ تعلقات عامہ آئی ایس پی آر آپریشن نا وخت آ بی ایل اے آن تعلقداری تخوکا بندغ آتا خلنگ نا پارے اندن اسہ کارندہ ئسینا کہنگ نا پک ئے کرے۔
ارٹمی نیمہ غان بی ایل اے نا جارکش بلوچ سرمچار آتا خلنگ مننگ نا پاننگ ئے دروغ پاریسہ پارے کہ ہرنائی و زیارت نا علاقہ آتیٹی پنی آ سرچ آپریشن نا وخت آ بلوچ لبریشن آرمی نا سرمچار آتا شہید کننگ نا پاکستان نا پاننگ فوج ئنا پروپگنڈہ نا سلاہ ئسے، ہرانا مسخت بلوچستان ئٹی تینا بے سرسوبی و شکست ئے ڈھکنگ ئے۔
