چین ئنا علاقہ ٹی اقلیتی مسلمان مذھب تون تعلقداری تخوکا برانزی و پولیس نا نیام ئٹ ہمو وخت جھڑپ آک بناء مسر ہرا وخت اوفتے اسہ مسجد ئسیٹ عبادت کننگ آن توننگا۔ دا مسجد نا بارو ئٹ برانزی تا خیال ءِ کہ کالخواک دادے ڈھرفنگ خواہرہ۔
جھڑپ آک تدوکا ہفتہ نا اخیر ئٹی صوبہ یوننان ئٹی 13 می صدی نا ناجیاینگ مسجد نا پیشن آ بناء مسر، ہراڑے ہوئی نسل آن تعلقداری تخوکا مسلمان تا بھلو کچ ئس آباد ءِ۔
چاگڑدی حوالکاری میڈیا آ تالان مروکا ویڈیو و جنسار آ تیٹ خننگِک کہ جھڑپ آتا وخت آ وردی بینوک پولیس کارندہ آک کیہی بندغ آتے مسجد ئٹی پیہنگ آن توننگ ءُ۔
پولیس تون ہُرے اسکان برجای مروکا جھڑپ آن گُڈ ہرا وخت اوفتا کچ ئٹی کمبوتی مس تو بندغ آک مسجد ئٹی پیہار۔
چین ایہُن سرکاری حساب آ اسہ ملحد ریاست ئسے، ولے حکومت بیرہ چار مذہب ءِ منیک و اوفتے مذہبی آزادی نا موکل ایتک۔ اوفتیٹ، بدھ مت، تاؤ ازم، کیتھولک و پروٹسٹنٹ ءُ۔
مسلمان اقلیت و چینی قانود نافذ کروکا تا نیام ئٹ دا اولیکو چک و تاڑ اف داکان مُست ہم کیہی وار دنو چک و تاڑ و جھڑپ آک مسنو۔
