بلوچ نیشنل موومنٹ نا چیئرمین ڈاکٹر نسیم بلوچ بارکھان ئٹی مروکا تدینی نا زی آ پارے کہ ریاست و ریاست نا ایجنٹ آتا دو آن بلوچ نسل کشی و زوراخی ٹی گیشی بسونے۔ بارکھان ئٹی ہند ئنا ایم پی اے و پنی آ وزیر عبدالرحمن کھیتران اسہ لمہ ئسے شش چنا تیتون تینا ذاتی جیل ئٹی تخا۔ اوفتیٹی اسہ مسڑ چناس ہم تد اسک۔ اوفتے چار سال اسکان جسمانی ،ذہنی و جنسی تشدد نا گواچی کننگ آن پد خلکر اوفتا جون آک سئے شمبے نا دے عبدالرحمن نا ارا نا خڑک آ رسینگاسر۔ اوفتا زوراخی تا جواب ءِ تننگ کن بندغاتے دا حیوان نا خلاف مزاحمت کننگ خوائک ۔ ریاست و ریاستی ایجنٹ آتا بر خلاف مزاحمت ننا کل ئنا فرض ءِ ۔ بلوچ چاگڑد ئٹی دن انگا کڑدار آتا ہچو جاگہ ئس اف۔ پاکستانی ریاست بلوچستان ئٹی راجدوستی سیاست نا زی آ پابندی خلیسہ ننا سرزمین ءِ پارلیمانی تنظیم آتا حوال کرینے کہ بلوچ روایات آتے آسانی ئٹ بھس کے۔
ڈاکٹر نسیم پارے کہ چنا تا باوہ خان محمد گزینی مری اخس وار چاگڑدی میڈیا ٹی پنی آ قبائلی سربراہ آتا کمک نا خواست کرینے ولے اسہ بلوچ اس مننگ نا سوب آن اودے خف توننگ کن کس اس مونی بتنے۔ کھل قبائلی بندغاک درو ہم بے توار اسر و اینو ہم اوفتا قتل نا زی آ بے توار ءُ انتئیکہ اوفتا و عبدالرحمن نا خواجہ اسٹ ئسے۔
دا چناتا ذاتی قید ئٹی مننگ نا بابت آ تینٹ پاکستان نا سینیٹ ئٹی سینیٹر کامران مرتضی پاریس اس کہ خان محمد نا زائیفہ و چناک اسہ صوبائی وزیر ئسینا قید ئٹی ءُ ولے دا نا زی آ کس اس ہچو توجہ اس تتو انتئیکہ بلوچستان ئٹی کل ایم پی ایک جی ایچ کیو آن ہرفنگ مریرہ دافتا بدل ئٹ اوفتے بلوچ آتا زی آ زوراخی و نسل کشی نا ذمہ واری تننگ مریک۔ دا پنی آ اسمبلی نا کل باسک آک پاکستانی لشکر نا پاننگ ئٹ بلوچستان ئٹی بندغاتا تذلیل،قتل ، راجدوستی نا سیاست ءِ توننگ آجوئی خواہوک آتا مخبری و مذہبی شدت پسندی شینک کننگ ئٹی برجاء ءِ۔ دن انگا تدینی تا زی آ اوفتا بے تواری ننا ہیت ءِ پک کیک۔
اوفک مونی پاریر کہ عبدالرحمن کھیتران خان محمد مری نا چنکا مسڑ فرزانہ ءِ جنسی درندگی نا گواچی کرے و پدا گٹ آن تڑیسہ ہرا حیوانی ئٹ اودے خلنگ دا ہیت ئنا دلیل ءِ کہ صوبائی وزیر تینا خواجہ نا پاننگ ئٹ دا کل گڑاتے کننگ ءِ۔ ایلو نیمہ آن دن انگا زوراکی تے کننگ ماہل بلوچ نا کیس ئنا نیمہ آن توجہ ءِ مر کننگ ءِ۔ بارکھان نا تدینی سخت تکلیف دہ ءِ و بلو جرم ئسے۔ پاکستانی ریاست موہان بلوچ آتے بنیات آن ختم کننگ نا فیصلہ کرینو داسہ وخت بسونے کہ جہانی ادارہ آک مداخلت کریسہ بلوچ نسل کشی ءِ توننگ کن کڑدار ادا کیر۔
ڈاکٹر نسیم بلوچ مونی پارے ریاستی ادارہ آتا کمک ئٹ پنی آ وزیر عبدالرحمن کھیتران خان محمد مری نا ارائی گراناز، اونا مسڑ فرزانہ و اونا بیست دو سالی آ مار محمد نواز ، پانزدہ سالی آ عبدالقادر و چنکا مسڑ ءِ بے دردی ئٹ قتل کریسہ جون آتے بٹے۔ گراناز تینا زند ئٹی عبدالرحمن نا زی آ الزام خلکس و دا ہیت ءِ پک کریس اس کہ اوفک عبدالرحمن نا جیل ئٹی غلام آتا وڑ ئٹ زندگی کننگ ءُ۔ ولے پدا ہم عبدالرحمن کھیتران اوفتے خلنگ ئٹی مچٹ ہم خلیتو انتئیکہ او چائک ریاستی ادارہ آک اودے بچیفور۔
بی این ایم نا چئیرمین پارے کہ بارکھان و دا وڑ ئنا کیہی تدینی تان پد ہم کس اس دا پوہ مریک کہ اوفک پاکستان نا فریم ورک ئٹی مریسہ بلوچ حق ، ننگ و ناموس نا رکھ ءِ کرور گڑا اوفک بلو ردی اس کننگو۔ پارلیمانی پارٹی تا باسک آک دا ہیت ءِ پوہ مریسہ بلوچ آجوئی جہد اتون اوار مریر تانکہ اوفک تینا ضمیر ءِ مطمئن کریسہ بروکا نسل آتے کن جوان ءُ مثیل ئس جوڑ کیر ۔ اگہ نہ اوفک تاریخ ئٹی عبدالرحمن کھیتران نا وڑ انگا کڑدار آتا جرم ئٹی اوار مرور۔
