بلوچ نیشنل موومنٹ نا چیئرمین ڈاکٹر نسیم بلوچ تینا شنگ کروکا بیان ئٹی پاکستان نا برجاء حالیت نا بابت ئٹ پارے کہ پاکستان نا تہہ ئنا بگڑینگوکا حالیت پیشن نا ڈیہہ تا سرمایہ کار آتیٹ پین خلیس ودی کرینے، ہراڑان اونا مالی استحکام و دیوالیہ مننگ نا بابت ئٹ شک ودی مسنے۔
او پارے کہ فوج و عدالت آتون اوار تینا غٹ ادارہ آتیٹ بھلو کچ ئسے نا کرپشن و ونڈ مننگ تون اوار پاکستان بیم تروک حالیت تون مون تننگ ءِ۔ بھلو کچ اسیٹ بھس کاری تالان کروکا سلاہ تا ساڑی مننگ حالیت نا خطرناکی ءِ پین ودفینے۔
ڈاکٹر پارے کہ جوہری آزموندہ آک مُست آن بلوچستان آ زہم تخانو، ہراڑان تیبہ عیلاقہ ٹی تابکاری و نسخان تروک زہم ارے۔ بلوچ ایلو پد تموک قوم آ تون اوار دا لعنت تون مون تننگ ءِ۔
او خواست کرے کہ دا المی ءِ کہ عیلاقئی و جہانی تاغت آک ظلم، محکومیت و کالونائزیشن ءِ توننگ کن ننا جہد ئٹی ننتو کمک کیر۔
