بلوچستان ئٹی سیلاب و طوفانی پِر تے آن متاثر مروکا بندغاتے کن کراچی نا جتا جتا انگا بلوچ ہنداتا کُمکی گدانک ارٹمی دے ہم برجاء ۔ کُمکی گدان تیٹی لس بندغاک بلو کچ ئسیٹی بسونو و کُمکی سامان، نقدی زر مُچ کرینو۔
دا گدانک بلوچ یکجہتی کمیٹی کراچی نا نیمہ غان خلنگ مسونو و دا دوشمبے نا دے اسکان برجاء مرور ۔ بلا گدان سلمان ٹاور،ملیر پندرہ امام بخش مارکیٹ نا خُڑک آ خلنگ مسونو و جمعہ گوٹھ،ملا عیسی گوٹھ ،غازی ٹاؤن،نیو شفیع گوٹھ،کوہی گوٹھ،کاٹھور،شرافی گوٹھ ،فقیر کالونی و صالح محمد گوٹھ ئٹی کُمکی گدانک برجاء ءُ۔
یک شمبے نا دے 17 گدان خلنگ مس ،کُمکی گدان تیٹی بندغاک بریسہ کمبل ، پُچ ، لیپ، سی،برنج،دال،شکر و ایلو گڑاتے تون اوار نقدی زر ہم مُچ کریر۔
یک شمبے نا دے بلوچ یکجہتی کمیٹی کراچی نا جارکش تینا اسہ شینک کروکو پریس ریلیز ئسیٹی پارے کہ کُمکی گدان تے اینو ارا دے سرجم مسونے اوفتیٹی بندغاک بلو کچ ئسیٹی اوار مسُور و کُمکی سامان مُچ کریر۔ جارکش پارے کہ دا گدانک مُسہ دے کن خلنگ مسونو و دا دوشمبے اسکان برجاء مرور ۔ جارکش اُلس آن خواست کرے کہ بندغاک دا کیمپ آ تیٹی بریسہ کیر و سیلاب زدہ تا کُمک مریر۔ اینو کُمکی گڑاتا پُر مُسہ ٹرک آتے بلوچستان نا ہند وندر،اوتھل،لاکھژا و ایلو ہنداتیٹی رائی کننگانے
