ملکہ برطانیہ الزبتھ دوم نا تابوت اینو بذریعہ روڈ بالمورل آن ایڈنبرا غا سر کننگو۔
دران ڈیھہی حوال ایجسنی نا رد ئٹ ملکہ برطانیہ نا تابوت ایڈنبرا تاریخی ہالیروڈ ہاؤس نا محل آ رسینگا اودے گارڈز آف آنر تِننگو۔
دا تابوت شاہی خاہوت نا ارکان آتا ہمراہ سینٹ جائلز کیتھیڈرل ایڈنبر اسکان مروئے ایڈنبر نا کیتھیڈرل ئٹی دعائیہ تقریب ئس اڈ تننگو ، ہندا وڑ 24 گھنٹہ اسکان ہنداڑے مرو۔
دران ڈیھہی حوال ایجسنی نا ردئٹ ملکہ نا تابوت ئے بذریعہ بالی گراب پگہ لندن آ ہتنگ مرو۔
ملکہ برطانیہ الزبتھ دوئم نا ایسری رسماک 19ستمبر آ ادا کننگور۔
پک مرے کہ برطانیہ نا ملکہ الزبتھ الیگزینڈرا میری ونڈسر 8 ستمبر آ 96 سال ئنا عمر آ بیران مسس۔
ملکہ ئے تدوکا سال اکتوبر آن صحت نا مسئلہ ئس ، ارانا سوب آن اودے ہِننگ و بش مننگ ئٹی مشکل مسکہ۔
ملکہ برطانیہ ملکہ الزبتھ نا بیرانی آ آسٹریلیا ٹی 22 ستمبر آ سوگ مروئے ، و او دے آ آسٹریلیا ٹی عام تعطیل مروئے۔
آسٹریلوی وزیراعظم ملکہ برطانیہ نا ایسری رسماتیٹی اوار مرو۔
ارٹمی نیمہ غان قطبی کوریا نا صدر یون وک یول ہم ملکہ برطانیہ الزبتھ دوئم نا ایسری رسماتیٹی اوار مرو۔
کینڈین وزیر اعظم جسٹس ٹروڈ پارے کہ کینڈین پارلیمنٹ ٹی پنچ شمبے آ ملکہ برطانیہ الزبتھ دوئم ئے خراج عقیدت پیش کننگو و ملکہ برطانیہ نا ایسری رسم آتا پیش نظر کینڈین پارلیمنٹ نا اوپننگ سیشن اسہ دے ئس تاخیر آن 20 ستمبر آ مرو۔
