مکران ڈویژن ئٹی اولی وار براہوئی زبان ہیل کننگ نا سلسلہ تربت سول سوسائٹی نا نیمہ آن بنا کننگار۔
بلوچاتا ایلو بلا زبان براہوئی نا کلاساک جنوری آن عطاشاد ڈگری کالج تربت ئٹی بنا کننگار اوٹی ورناک بلو کچ ئسیٹی دلچسپی ہرنگءُ ۔
تربت سول سوسائٹی نا نیمہ آن تربت ئٹی براہوئی زبان ہیل کننگ نا اعلان آن پد بلو کچ ئسیٹی نرینہ،نیاڑی خصوصاً ورناتا نیمہ آن بلو کچ ئسیٹی دلچسپی مونی بسونے،گورنمنٹ عطاشاد کالج ئٹی 20 جنوری آن براہوئی کلاس آتا بنا بیگاہ نا 5،6 بج آ کننگا۔
تربت سول سوسائٹی نا کنوینر گلزر دوست پارے کہ تربت ئٹی براہوئی زبان نا کلاساک بلوچ آتا ایلو بلا زبانءِ مکران ریجن ئٹی مونی ہتنگ و تینا زبانءِ ہیل کننگءُ ۔
اوفک پاریر کہ مکران ریجن نا بندغاک تینا دا زبان آن واقف مفننگ نا سوب آن کوئٹہ ،جھالاوان یا سراوان آ کارہ اوڑے درامدی محسوس کیرہ انتئیکہ براہوئی زبان داخس عام اف، داڑے کلاساتے بنا کننگ نا بلا مسخت ہندا مُری تے خلاس کننگءِ ، ورناتا داخس دلچسپی ہرفنگ نن کن حوصلہ و ہمت ئسے۔
اوفک پاریر کہ بروکا وخت ئٹی ننا ہندا کوشستءِ کہ جھالاوان ،سراوان و رخشان ئٹی بلوچی ہیل کننگ نا سلسلہ تے بنا کینہ تاکہ ننے ٹی تینا زبان تے مُر کننگ نا مُریک خلاس مریر۔
