زیارت تدینی آن پد گورنر ہاوس نا مونا ریڈ زون ئٹی برجاء بلوچ بیگواہ بندغ آتا خاہوت آتا برانز ئے اینو 34 دے پورو مس ، 50 آن خڑک بلوچ زوراکی ئٹی بیگواہ بندغ آتا خاہوت آک تدوکا اسہ توہ ئسیان بھاز تینا جائز خواست آتا منفنگ کن برانز آ تولوکو۔
اینو خاہوت آک تینا برانزی پروگرام ئے پین مرغن کریسہ ڈی سی او کوئٹہ نا درو نا وعدہ خلافی آ مجبوری آن واپس جی پی او چوک و اسمبلی چوک سرینا ہوٹل نا مونا روڈ بلاک کریر، اینو سہب یانزدہ بجہ آن سی جی پی او چوک و دوانزدہ بجہ آن اسمبلی چوک ئے ہم ٹریفک کن بند کننگا، اسمبلی چوک آ ڈی سی او و ایس ایس پی کوئٹہ بریسہ برانزی آتون ہیت کرے و پارے کہ ایڈیشنل چیف سیکرٹری و ڈی آئی جی بریسہ خاہوت آتون ملور، دا وخت آ خاہوت آتا پاننگ اسک کہ اوفک بیرہ ملنگ کن بفس بلکن اوفتون ننا مسلہ آتا حل ہم مرے، ڈی سی او و ایس ایس پی نا بھاز منت و دا یقین تننگ آن کہ او دا مسلہ آ کالخواہ تون میٹنگ کرو و نن نا دہ بجہ اسکان دا ذمہ وار آک اوفتون ملنگ کن الم برور گڑا اندا سوب آن خاہوت آک اسمبلی چوک و نن نا پنچ بجہ آ جی پی او چوک آ روڈ بلاک ایسر کننگا۔
دا وخت آ وی بی ایم پی نا جنرل سیکریٹری سمی دین بلوچ نا پاننگ اسک کہ ننے کوئٹہ نا بندغ آتا فریشانی نا سما ارے، ولے نن مجبور ان کہ روڈ بلاک کین تانکہ ننے خنیر و بنیر، نن تدوکا 34 دے آن گدان خلوک برانز آ تولوک ان، ننتون چنکو چنکو چنا و پیر او نیاڑی ہم اوار ئے ہرافتا بندغ آک زوراکی ئٹ بیگواہ او گڑا عام بندغ آتے دافتا دڑد و غم آتا ہم احساس مروئی ئے و ننا جائز خواست آتا منفنگ کن ننتون کمک مریر۔
اوفتا پین پاننگ ئے کہ نن تدوکا دے ہم تینا روڈ بلاک برانز ئے ڈی سی او کوئٹہ شے حق بلوچ آن اونا بلوچی زبان نا خاطر کریسہ ایسر کریسون، ننے مجبوری ئٹ پاروی تمیسہ ئے کہ او تینا بلوچی زبان آ سلیتو ولے نن اینو ہم ڈی سی او و ایس ایس پی کوئٹہ ننے یقین تننگ آ روڈ بلاک ئے ایسر کننگن و دافتا تروکا وخت اکن انتظار کننگ ان، اگہ ایڈیشنل چیف سیکرٹری و ڈی آئی جی اوڑتون ملتو و ننا مسلہ نا حل ئے ہتپک گڑا نن مجبور مرینہ کہ تینا برانز ئے پین مرغن کریسہ بروک آ پگہ داکان ہم سختو گام ہرفن۔
سمی دین بلوچ سوشل میڈیا نا پلیٹ فارم ٹویٹر آ صوبائی وزیر اعلی قدوس بزنجو نا دا بیان آ کہ " زوراکی ئٹ بیگواہی آتا مسلہ صوبائی مسلہ ئس اف، بلوچستان ئٹی برانز کننگ سمجھ آن پیشن ئے " او دانا زی لکھیسہ پارے کہ اوفک اسہ توہ ئسیان بھاز مسونے کہ ریڈ زون آ تولوک او، اوفک اسلام آباد آ ہم ہنناو وا دا وخت ئنا وزیر اعلی تون ہم ملانو، آرمی چیف اوفتون ملپک، کور کمانڈر اوفتون ملپک گڑا وزیر اعلی پار کہ آخر نن ارانگ کان؟
ساف مرے کہ گورنر ہاوس نا مونا خاہوت آتا برانز ئے اسہ توہ ئسیان بھاز مسونے ولے داسکان اوفتا خواست آتے مننگ یا بننگ ئٹ حکومت سوبر اف۔
