بلوچ وومن فورم نا نیمہ آن بلوچستان ئٹی زالبول و چُنا تا جبر ئٹ بیگواہی نا برخلاف اسہ برانز ریلی ئس کشنگ مرو۔ بلوچ وومن فورم نا جارکش تینا شینک کروکا درشان ئٹی پڑو کریسہ پارے کہ ہڑدے بلوچستان ئٹی زالبول و چُناتے جبر ئٹ بیگواہی نا گواچی کننگو ہرا اسہ پریشانی نا ہیت ئسے۔
اوفک مونی پاریر کہ ریاست بلوچستان ئٹی تینٹ حالیت ءِ خراب کننگ ءِ ، داکان مُست ہم پاکستانی لشکر ہوشاب، کوئٹہ،بولان و ہرنائی آن جبر ئٹ بلوچ زالبول آتے بیگواہ کرینے ولے دا تدینی تا بابت آ میڈیا و ریاستی کالخواک بے توار ءُ ۔ دا ہیت ئنا گُمان ارے اگہ پاکستانی لشکر ءِ بلوچستان ئٹی ہندا وڑ ئٹ یلہ کریر گڑا دا تدینی تیٹی تیزی برو۔
جارکش پارے زالبول و چُنا تا جبر ئٹ جبر ئٹ بیگواہی تا بر خلاف پگہ یک شمبے 19 فروری نا دے سُہب ئنا دہ بجہ آ ڈگری کالج آن اسہ برانز ریلی ئس کشنگ مرو ۔
نن کوئٹہ نا شرفمَنْد انگا اُلس آن خواست کینہ کہ بلوچ راج ئنا زی آ برجاء آ زوراکی تا بر خلاف تینا توار ءِ بُڑز کیر و دا سْیاسی زرمبشت ئٹی نن تون اوار مریسہ مظلوم انگا راج آتا توار مریر و تینا اواری ءِ یخینی کیر۔
