بلوچ وومن فورم نا جارکش پارے کہ بلوچستان ئٹی کیہی وخت آن ورنا ، زالبول و چُناتے بیگواہ کننگ نا سلسلہ برجاء ءِ ۔ زالبول،ورنا، نودربر و چُناتے زورانسری بیگواہ کننگ غیر قانونی عمل ئسے ۔
اوفک پاریر کہ بیگواہ تہ خاہوت آتے اذیت کننگ و زدکوب کننگ ، چُنا و زالبول آتے اجتماعی سزا تننگ ایوکا ڈیہی نا بلکہ جہانی آئین آتا برخلافءِ ۔
تدوکا ہفتہ ٹی شال آن رحیم زہری و اونا زائفہ رشیدہ ، لمہ و اِرا چُنا توں دزگیر کریر ، لمہ و اِرا چُناتے یلہ تننگ مس وخت ئس کہ اسہ ہفتہ ئس گدرینگ آن پد ہم رحیم و اونا زائفہ دائسکاں بیگواہ ءُ ، رشیدہ نا چُنکا مسڑ لمہ آن بیدس تکلیف و اذیت ئٹی ءِ ۔
اسہ نیمہ آن حکومت زالبول آتا حق آتا تحفظ و ٹاپارءِ خلیک ، ایلو نیمہ آن عمل آک کُل قانون آتا برخلافءُ ، دُن سردار و میر و متعبر آ بندغ آک اراکہ تینا زاتی جیل اڈ کرینو ، ہندا دے تیٹی اسہ ویڈیو ئس وائرل مسونے ، اراکہ محمد خان مری نا زائفہءِ قران مجید ئس چست کرینے تینا و تینا چُناتے اذیت ئٹ تخنگ نا دعویٰءِ کننگءِ ، ہرنا چُنا سردار کھیتران (صوبائی وزیر) نا نجی جیل ئٹ بندو ، عدالت دانا نوٹسءِ و متاثر آ خاہوت ءِ اونا مسڑءِ آجو کرفیسہ اوفتے انصاف ہیتءِ ۔
بلوچ وومن فورم حکومت و بندغی حقوق آتا تنظیم تے آن خواست کیک کہ رشیدہ ءِ زو یلہ کریفر اگاں اوفتا زی آ ڈوہ اس ارے گڑا عدالت ئٹی ہتنگ مریر۔
