بلوچ یکجہتی کمیٹی نا بنجاہی جارکش ، رشید بلوچ نا لمہ نا دڑد تکلیف ئٹی دا دنیا آن رخصت کننگ آ اوسوز نا درشانی ءِ کریسہ پارے کہ بلوچ لمہ آک تینا تا کسرتا ہریسہ تینا ساہ آن دو ہرفیرہ۔ رشید بلوچ نا لمہ نا مرک ئنا ذمہ وار ریاست ءِ انتے کہ اونا چُنا ءِ پنچ سال آن بےگواہ کرینے ۔
جارکش پارے کہ رشید نا لمہ اولی بندغ افک ، ہراکہ تینا چُنا نا جتائی نا دڑد ءِ برداشت کتو ءُ وفات کرے ، بلکہ بلوچستان نا ہر عیلاقہ ٹی دونو تدینی خن ئٹ بریک ، بلوچستان نا تہٹی دونو اُرا و گلی ئس افک کہ اراڑے بےگناہ ءُ بندغ ئس بیگواہ متنے ، و اوفتے قید کننگ متنے ، خاہوت آک مسلسل ہندا خواست ءِ کیرہ کہ ننا اگہ بندغاک گناہ ئس کرینو ، تو اوفتے عدالت ئٹی پیش کننگ مرے ، و قانون نا رد ئٹ اوفتے سزا تننگ مرے ، ولے بلوچستان نا معاملہ ٹی قانون و آئین نا خلاف ورزی کننگ مسنے۔
جارکش درشان نا ایسر ئٹی پارے کہ رشید و آصف تون اوار کُھل بلوچستان نا کُل زورانسری بےگواہ تا یلہ مننگ کِن مطالبہ کریسہ پارے کہ پاکستان نا مین اسٹریم سیاسی جماعت آک بلوچستان نا بندغ آتا رحم و کرم آ یلہ کننگ مف ۔سپریم کورٹ آف پاکستان ءِ خواہک کہ او بلوچستان ئٹی مداخلت کے و انسانی حقوق آتا سنگین خلاف ورزی نا برخلاف آ گام ہرفے ۔
