بلوچ یکجہتی کمیٹی نا مرکزی جارکش ایچ آر سی پی نا داسہ نا دے تیٹی بلوچستان نا دورہ آ فیک فائنڈنگ رپورٹ آ شنگ کروک درشان ئٹی پارے کہ بلوچستان نا رد ئٹ فیک فائنڈنگ رپورٹ ئٹی ارا خدشات آتا اظہار کننگ مس ئس اوفتا رد ئٹ ، نن اخہ سال آن ڈیھ ئنا کُل سیاسی و انسانی حقوق آتا تنظیم آتے آگاہ کرینُن و اوفتے مخدوش صورتحال آ گام ہرفنگ نا پاننگ ئٹی ءُ ۔ ولے بدقسمتی آن بلوچستان نا رد ئٹ بیرہ میڈیا نہ بلکہ انسانی حقوق آتا تنظیم آتا ہم رویہ ریاست نا وڑ مسُنے ، و بلوچستان نا خراب اِنگا حالیت آتے مسلسل نظرانداز کرینو ، اومیت کینہ کہ ایچ آر سی پی نا نیمہ غان دا دورہ و فیک فائنڈنگ رپورٹ آن پد ، پدا مکمل خاموشی اختیار کننگ مفرو۔
جارکش پارے کہ ایچ آر سی پی تینا فیک فائنڈنگ رپورٹ ئٹی بلوچستان نا زورانسری بےگواہی تا سنگین خلاف ورزی ،ریاست نا نیمہ غان زالبول آتے مون تروک چیلنجز ، نودربر آتا زورانسری بےگواہی و پروفائنلنگ ، مکران ئٹی سیکورٹی ادارہ تا نیمہ غان ملٹرائزیشن ، و پین ہزار مسئلہ آتا ردئٹ قدم ہرفو، بلوچ آتا زندگی تے بھلو مسئلہ درپیش ءِ ، کل ئنا روزگار تے پلنگانے۔
درشان نا ایسر ئٹی پارے کہ ایچ آر سی پی تون اوار ڈیھ و ایلو مین اسٹریم سیاسی پارٹی ، عدلیہ ،سول سوسائٹی و انسانی حق آتا تنظیم آک اسہ جاہ مریسہ ، بلوچستان نا سیکورٹی ادارہ تا جواب طلبی کیر ، اگہ دنق گام ہرفنگ متو تو ، دانا نتائج آک مُستی بھاز خطرناک مرور ، فیک فائنڈنگ رپورٹ ئٹی بلوچستان ءِ کالونی نا وڑ ئٹ ڈیل کننگ نا زکر کننگانے ، او حقیقت آ مبنی ءِ و اگر دا رویہ ئے ترک کننگ متو تو حالت آک پین بھاز خراب مرور ۔
