تربت : بلوچ اسٹوڈنٹس آرگنائڑیشن پجار نا بنجائی ترجمان تینا بیان ئٹ پارے کہ تربت یونیورسٹی نا خوانندہ آتا برانز آن گڈ گورنر بلوچستان واجہ حمل بلوچ ءِ تینا نمائندہ کریسہ یونیورسٹی نا ویل و خوانندہ آتا تحفظات آتے مُر کننگ نا ذمہ واری تس ہراڑا واجہ حمل بلوچ خوانندہ آتے تینا اُرا ٹی بٹنگیسہ اوفتا خواست آتے بِنگ و اوفتا خواست آتے گورنر نمائندہ نا حیثیت ئٹ جائز پارے۔
او تربت یونیورسٹی نا وائس چانسلر تون اوڑدئی کرے و وائس چانسلر تربت یونیورسٹی نا کلہو آتیان خوانندہ آتے پُہہ کرے ہرافتیٹ ڈسپلینری کمیٹی نا فیصلہ آتا معطلی و ڈسپلیری کمیٹی نا ایسری تون اوار ایلو ویل آک اوار ئسر۔
تدوکا دے تیٹ تربت یونیورسٹی نا ڈسپلینری کمیٹی نا کنڈ آن اسہ پریس رلیز ئس شنگ کننگا ہرادے تینے آن کھپفوک و دروغ پاریسہ اوڑان نمن کننگا۔ بنجائی ترجمان پارے کہ نن کیہی وار تربت یونیورسٹی نا بست و بند نا بے پامی و غلط بیانی و یونیورسٹی ٹی کرپشن نا پیدواری کرینن۔
ترجمان پارے کہ تدوکا دے تیٹ تربت یونرسٹی نا بست و بند نا غلط بیانی تینا ساڑی پریس ریلیز آن پاش مریک کہ یونیورسٹی اف تربت نا منَہ کرپٹ افسر تربت یونییورسٹی نا حالیت و تعلیمی ماحول ءِ گچین وڑ ئٹ برجاء تخنگ نا حق ئٹی افس۔ ہرافتیٹ ساڑی پرو وئس چانسلر و رجسٹرار تون اوار ایلو ڈسپلینری کمیٹی نا باسک آک اوار ءُ۔
تربت یونیورسٹی نا بست و بند نا دروشم ئٹ مونا خرماک تعلیمی ماحول نا برخلاف چم بازی تیٹ آختہ ءُ۔
