بلوچ اسٹوڈنٹس آرگنائزیشن آزاد نا بُنجاہی جارکش تینا شینک کروکا درشان ئٹی پارے کہ اینو آن نوہ سال مُست تنظیم نا مُسکوہی چیئرمین زاہد بلوچ ءِ کوئٹہ آن زورانسری ئٹ بیگواہ کننگا، جہانی ادارہ آتان اخس خواست و سخت اِنگا برانز آن پد ہم زاہد بلوچ انگہ پاکستانی لشکر نا اذیت گاہ تیٹی سَزا سگِنگ ءِ ۔
جارکش پارے کہ زاہد بلوچ نا داخسو مُدت ئسے آن بیگوائی و پدا آجو مفننگ بندغی حق آتا ادارہ و جہانی تنظیم آتا غیر ذمہ واری نا ثبوت ءِ ۔
اوفک پاریر کہ زاہد بلوچ نا زورانسری بیگواہی کن تنظیم نا نیمہ آن بلوچستان تون اوار ایلو ڈیہہ تیٹی برانز کننگا و بین برانز گدان ئس ہم اڈ تنگا ہرادے بندغی حق آتا جہانی ادارہ آتا باور کریفنگ آن پد بند کننگا ولے نوہ سال آن پد ہم بندغی حق آتا تنظیم آتا نیمہ آن ہچو گامگیج ئس وے ہرفنگ و زاہد نا آجوئی کن کردار ادا وے کننگ بندغی حق آتا تنظیم آتا زی آ سوالیہ نشان ئسے ہراڑان زاہد بلوچ نا خاہوت اذیت نا گواچی ءِ ۔
اوفک مونی پاریر کہ زاہد بلوچ اسہ پُر ایمن سْیاسی جہدکار ئس اسک و بی ایس او آزات نا پلیٹ فارم آن بلوچ خوانندہ آتا رہنمائی کرسہ کریکہ ۔ پاکستانی لشکر اسہ قوضہ گیر ئسینا دروشم ئٹ بلوچستان ئٹی تیبہ سْیاسی کاریم تا زی آ پابندی خلکُنے و ہزار آتا کچ سْیاسی باسک آتے زورانسری ئٹ بیگواہ کننگانے و کیہی تا جون تے بٹینے۔ پاکستانی لشکر تنظیم نا مُسکوہی وائس چیئرمین ذاکر مجید بلوچ ءِ زورانسری ئٹ بیگوائی نا گواچی کرینے ارادے 14 سال گدرینگ آن پد ہم یلہ کتنے۔ ہندُن تنظیم نا مُسکوہی انفارمیشن سیکریٹری شبیر بلوچ تون اوار کیہی سْیاسی باسک آک بیگواہ ءُ و پاکستانی ٹارچر سیل آ تیٹی بند ءُ ۔
اوفک تینا درشان نا آخر ئٹ پاریر کہ بندغی حق آتا جہانی تنظیم آتا یقین دہانی تا زی آ عمل کریسہ زاہد بلوچ نا زورانسری بیگوائی نا بر خلاف کردار ادا کیر و زاہد بلوچ تون اوار ہزار آتا کچ باسک آتا آجوئی کن پاکستان آ دباؤ شاغِر۔ بی ایس او آزات 18 مارچ 2023 آ زاہد بلوچ نا زورانسری ئٹ بیگواہی نا برخلاف و اونا آجوئی کن #SaveZahidBaloch نا ٹیگ ئٹ سوشل میڈیا ٹی کیمپین نا پڑو ءِ تیک و آجوئی خواہوک سْیاسی پارٹی تا باسک آ تیتون اوار زند ئنا کُل بشخ ئنا بندغ آتیان خواست کیک کہ کیمپین ئٹی اوار مریسہ و اودے سہبمَنْد کننگ ئٹی تینا کڑدار ءِ ادا کیر۔
