بلوچ اسٹوڈنٹس آرگنائزیشن نا بنجائی جارکش تنظیم نا مسکوہی حوالکاری سیکریٹری سنگت ناصر بلوچ نا ارٹمیکو سال دے ئنا رد ئٹ بیان ئس شنگ کریسہ پارے کہ سنگت ناصر بلوچ سخت انگا وخت ئٹی تنظیم ئی اہم ءُ کڑد ئس ایسری تس۔
ترجمان پارے کہ بلوچستان ئٹی ورنا تا اُست بند مننگ نا سوب آن کذیت آتیٹ ودکی ریاستی ظلم و زوراکی تا پیدواری ءِ۔ تدوکا سال آن چرجوئی ئٹ بلوچ خوانندہ آک اُست بند مننگ نا سوب آن کذیت کرینو۔ کراچی ٹی خوانندہ اشرف سلیمان بلوچ، اسحاق دشتی و الیاس بلوچ اُست بند مننگ نا سوب آن کذیت کریر و پنجاب یونیورسٹی ٹی اسہ خوانندہ ئس اُست بند مننگ نا سوب آن کذیت کریسس۔
ترجمان پارے کہ بلوچستان ئٹی بے روزگاری، عدم تحفظ نا مارشت ورنا تون اوار ہر بندغ ءِ زیمی کرینے ہرا نا زہم آک خود کشی تتون اوار اُست بند مننگ و ایلو ردعمل تا دروشم ئٹ مونا بریرہ۔
او پارے کہ سنگت ناصر بلوچ اسہ باہمت و حوصلہ مند ءُ سنگت ئس اسّ۔ او ہر ہڑاند ءِ خندہ پیشانی ئٹ قبول کریسہ مونی گام خلنگ ءِ اولیت تسکہ۔ ناصر بلوچ نا وخت آن مُست کذیت اونا خاہوت تون اوار تنظیم کن سانحہ ئسے آن کم اف ۔ اودے اونا مسٹمیکو سال دے آ خراجِ عقیدت پیش کریسہ قول کینہ کہ تنظیم تینا کیڈز تا جہد و قربانی تے ہچ وڑ آ ہم اُستان دروف و اوفتا مشن ءِ برجاء تخو۔ ترجمان غٹ زون آتے پنت ایتک کہ او ناصر بلوچ نا سال دے آ تعزیتی ریفرنس اڈ ایتر۔
