بلوچ اسٹوڈنس آرگنائزیشن آزاد نا مرکزی جارکش بلوچستان ئٹی فوج ئنا ہتنگ نا پاکستانی ریاست نا فیصلہ آ تبصرہ کریسہ پارے کہ مُہان لکھ آتا کچ ئٹ فوج ارے ۔ ہر عیلاقہ ٹی کیمپ ہندُن بےکچ چوکی ارے ۔ بلوچستان نا پورہ مکران ریجن ،خضدار ،آواران ، مشکے ،کولواہ ،گوادر و ساحلی عیلاقہ ، کوہلو ، کاہان،بولان،و ایلو شارتیٹی ، فوج تعینات کننگ نا مطلب بلوچستان ئٹی روان نسل کشی ، کھسفنگ و انسانیت سوز مظالم ئٹی گیشتری ہتنگے ۔
جارکش پارے کہ ہندا دے تے ئٹ ریاست نا تہٹی مروکا سیاسی حالت آتان فائدہ ہرفیسہ اسہ وار ئس پین توفک نا بیرل ئے بلوچستان نا نیمہ غا کننگ خوارہ ، بلوچستان آ مکمل قوضہ کننگ خوارہ ہنداڑے نسل کشی ٹی گیشتری ہتنگ خوارہ ۔ و ہندا پالیسی تا عمل پیرا مننگ نا تیاریک مننگ ءُ۔
و دا نسل کشی و لشکری قوضہ زیات مظبوط کننگ کن منہ پنی آ راجدوست سْیاسی پارٹیک بلوچ راجدوستی نا پوشاک ءِ بنیسا اقتدار نا خاطر قوضہ گیر تون ہر حساب کمک کننگ ءُ ۔ ہراٹی میجر جنرل فیصل نصیر ءِ خوش کننگ کن اونا حق ئٹ مروکا برانز آ تیٹی اوار مننگ ءُ ہندا جنرل کیہی سْیاسی باسک و ہزار آ لشکری آپریشن تا ذمہ وارءِ ولے بد بختی اقتدار کن ہندا پارٹیک اونا حق ئٹ نعرہ خلنگ ءُ ۔ اوفتا سربراہ تے یات کننگ خوائک کہ اوفک وختی فائدہ کن دا حرکت آتے کیر ولے تاریخ نا پنہ تیٹی اوفک قوضہ گیر نا کُمکار چاننگ مرور۔
جارکش بندغی حق آتا تنظیم آتا بابت پارے کہ بلوچستان داسا تیبہ لشکری گھیرہ ٹی ءِ ہڑدے بندغ آتے بیگواہ کریسہ اوفتا تشدد کروکا جون آتے بٹنگ و اوفتے دروغ ئنا مقابلہ تیٹی خلنگ نا سلسلہ برجاء ءِ ولے بدبختی آن بلوچستان ئٹی برجاء انگا ریاستی زوراخی بندغی حق آتا ادارہ تا خن ئٹی بفک۔ ریاست نا نیمہ آن بلوچستان ئٹی فوج ئنا ہتنگ مطلب داسا ہر اُرا نا مونا اسہ چوکی الئس مرو داٹی جہانی ایلُم تے نوٹس ہلنگ خوائک۔
