بلوچ اسٹوڈنٹس فرنٹ شال زون ئنا جارکش تینا شینک کروکا درشان ئٹی پارے کہ دنیا ٹی اخس تہذیب یافتہ و دیمرئی کروکو راج ءُ اوفک خواننگ نا اہمیت آن جوان واخب ءُ و تعلیم نا رد ئٹ ہچو سمجھوتہ ئس کپسہ انتئے کہ اوفک راستی ءِ پوہ ءُ بندغ نا کُل زند ئنا بشخ آتا دیمرئی خواننگ تون تفوک ءِ ۔ ہندا سوب آن اوفک خواننگ ءِ اولی ترجیع تیرہ و اوفتے ہر معاشی کُمک ءِ کیرہ ۔ ولے بلوچستان ئٹی دانا برعکس نا سنجیدگی ئس خننگ مریک و نہ دا ریاست نا ترجیع تیٹی اوار ءِ اگہ منہ تعلیمی ادارہ آک اریر اوڑے ہم جنجال آتا بلو کچ ئس ارے، منہ خواننگ نا ادارہ تیٹی ہچو اُستاد ئس اف۔
جارکش مونی پارے کہ بلوچستان یونیورسٹی واہم بلوچستان نا بلا و مُتکُنا خوانندہ ادارہ ءِ ۔ ہراڑے بازنگا بشخ آتا خواننگ ارے اسہ نیمہ آ داٹی فنڈ اف اگہ ارے گڑاس او ہم کرپشن نا زد ئٹی ءِ ۔
جارکش تینا درشان نا آخر ئٹ پارے کہ نن اُستاد و کاریم کروکاتا اواری نا برانز و اوفتا خواست ءِ جائز پوہ مرینہ۔ نن دا برانز نا مُخ تفی ءِ کینہ و اوفتون اوار سلوکُن۔ داکان بیدس نن مرکزی حکومت، حکومت بلوچستان و ایچ ای سی نا آن خواست کینہ اوفک بلوچستان یونیورسٹی ءِ زوت بیل آؤٹ پیکج تیر، تانکہ خواننگ نا عمل برجاء مرے نہ تو گڑا نن اُستاد و کاریم کروکا تیتون اوار برانز کننگ نا حق ءِ تخنہ۔
