بلوچ اسٹوڈنس ایکشن کمیٹی نا مرکزی جارکش تینا شینک کروکا درشان ئٹی پنجاب ٹی خوانوک آ بلوچ نودربر آتا پرایمن برانز آ لاٹھی چارج کریسہ اوفتے تشدد نا گواچی کننگ بلوچ نودربر آتا کسر ٹی رکاوٹ کننگ نا پالیسی نا تسلسل ءِ اراکے بھاز تکلیف تروکو ہیت ئسے ۔
اوفک پاریر کہ بلوچستان ئٹی خواننگ مفننگ نا سوب آن تیوعہ خطہ ٹی منہ محدود تعلیمی ادارہ ءُ ، ہرانا سوب آن بلوچ نودربر آتا اسہ بھلو کچ ئس پنجاب و اسلام آباد نا رخ ءِ کیرے ، ولے تدوکا منہ وخت آن ایلو صوبہ تیٹی نودربر آتے متعصبانہ رویہ آتا شکار کننگءُ، پنجاب ئٹی خوانوک آ بلوچ نودربر آتے متعصب رویہ آتا شکار کریسہ اوفتا تعلیمی تسلسل ٹی رکاوٹ کننگ ئٹی ءُ ۔ دا نودربر آتے وختس جامعات تیٹی انتظامی بنیات آتا تعصب نا شکار کننگ مننگے و وخت ئس پُرایمن برانز آتا زی آ تشدد کارمرز کننگءُ ۔
تینا درشان ٹی پاریر کہ جامعہ پنجاب ٹی پولیس پُرایمن برانزی تہ زی آ جلہو و نودربر آتا زی آ لٹ و شاپ کننگ متعصب پالیسی تا تسلسل نا بشخ ئسے ۔ دا وڑ ئنا رویہ ہچو ہم صورت اسیٹی قابل قبول افس ، و بطور تنظیم نن پنجاب نا جامعات ٹی خوانوک آ بلوچ نودربر آتوں سلوکُن۔
