بلوچ اسٹوڈنٹس ایکشن کمیٹی نا بنجاہی جارکش تینا اسِہ شینک کروکو درشان ئسیٹی پارے کہ بلوچستان یونیورسٹی نا تنخواہ تا وے تِننگ نا برخلاف برانز کروکا استاد و ملازم آتا مطالبہ آتا عمل وے کننگ تشویشناک ئے۔ کیہی وخت آن تنخواہ وے رسینگ آن اسِہ وڈ برانز کننگو، ہندا سوب آن تدریسی و غیر تدریسی عمل آن بندی ئنا آماچ ئے۔ کیہی وار کسرتا بننگ برانز کننگ و بلوچستان یونیورسٹی نا تدریسی عمل ئے بائیکاٹ کننگ آں گُڈ ہم اوفتا مطالبہ آتے سنجیدگی ئٹ وے ہلّنگ حکومت نا نااہلی نا پاشو ثبوت ئسے۔
بلوچستان ئٹی تعلیمی سسٹم مالو آن مفلوج مننگ آن نودربر آتا مستقبل تہار نظر بریک۔ بلوچستان ئٹی یونیورسٹی تا کم مننگ نا سوب آن بلوچستان یونیورسٹی، اولی یونیورسٹی ئے کہ اوڑے مُر مُر آن نودربر آک کیہی تغ تیتون بریرہ، داڈے تینا تعلیم ئے برجاء تخنگ نا کوشت ئے کیرہ ولے اوسوز نا ہیت ئسے کہ حکومت نا غیر سنجیدگی و بے ایمانی نا سوب آں بلوچستان یونیورسٹی جیڑہ آتا مرکز مریساٹے، داڑے ہڑدے پوسکنو جیڑہ ئس کاٹُم ہرفک، داران تعلیمی نظام متاثر مننگے، صوبائی تون اوار وفاقی حکومت آ زمہ واری عائد کننگ مریک کہ یونیورسٹی تے رکھینگ کِن تینا کڑد ئے ادا کیر، ولے تعلیمی کاریم تیٹی فنڈ تِننگ آ غیر سنجیدگی نشان تننگ تعلیم دشمنی نا برابر ئے۔
جارکش مُستی پارے کہ راج ئنا جوڑ کننگ کِن استاد نا اسِہ جوانو کڑد ئسے، اراٹی اوفک تعلیم و تربیت نا چراغ ئے، ولے ہڑدے بلوچستان ئٹی استاد آک کسرتا پیشنگرہ اسِہ تشویشناک ءُ عمل ئسے، دا لاپروائی نا ذمہ وار حکومت ئے، بلوچستان یونیورسٹی نا استاد و ملازم آتے تنخواہ وے رسینگ نا سوب آن تدوکا سال آن اسِہ وڑ برانز ئے، داڑان مھالو سردار بھادر خان وومن یونیورسٹی و بلوچستان یونیورسٹی آف ٹیکنالوجی، انجینئرنگ اینڈ مینجمنٹ سائنس نا استاد آک تنخواہ وے رسینگ آن برانز کننگ ہندا ہیت ئے پاش کیک کہ حکومت بلوچستان ئٹی تعلیمی سرگرمی تا مچٹ ہم خیال اف، حکومت نا وخت بلوچستان ئٹی ایلو غیر المی آ کاریم تیکن فنڈ تننگ و ترقی نا پن آ فنڈ آک ضائع مننگو، تو ایلو کنڈان تعلیمی و تخلیقی عمل مچ تعلیم دشمن پالیسی کو، ارافک چاگڑد ئے تعلیم و تخلیقی سوچ آں کشنگ اوفتے ارٹمی و مسٹمی جیڑہ آتا سلفنگ اسِہ سازشی و عمل ئس لگِّک۔
