شال : بلوچ نیشنل موومنٹ نا محکمہ سماجی بہبود نا اَسہ رپوٹ ئسے نا رد ئٹ ضلع آواران نا اِرا تحصیل مشکے و تحصیل آواران ئٹی 76 اسکول بند ءُ یا پاکستانی پوج قوضہ کرینے تا و تینا پوجی پوسٹ جوڑ کرینے تا۔
بی این ایم نا محکمہ سماجی بہبود نا رد ئٹ تحصیل مشکے نا سینزدہ و تحصیل آواران نا شست ءُ سئے اسکول آک بند مننگ و آسراتی نہ مننگ نا سوب آن چُنا تا خواننگ آ بھاز بھلو اثر ئس تمانے ۔ دا المیہ سے آن کم اف کہ ضلع آواران ئٹی بلوچ چُناک خواننگ آن محروم مننگ ئٹی ءُ ۔ خواننگ نا آسراتی تا کمی و اسکول آتا پوجی تا قوضہ خواننگ نا بنیاتی حق آتا خلاف ورزی ئے، دانا جہانی تنظیم آتے مذمت ئے کروی ئے۔
رپوٹ ئٹی ہندا پاننگا نے کہ بلوچستان ئٹی خواننگ نا دا پراگندہ انگا حالیت نا زی آ جہان نا ادارہ غاک توجہ ایتِر ۔
خواننگ اَسہ بنیاتی ءُ بندغی حق ئسے، داڑان محرومی اَسہ علاقہ سے نا سماجی و اقتصادی ترقی نا زی آ بھلو اثر ئس شاغک۔جہانی برادری ئے دا مسئلہ اے کم کننگ کِن زوت ئس مون مستی بروئی ئے و بلوچ چُناتے معیاری خواننگ اسکا سر کننگ نا بھروسہ ئے تروی ئے۔
جہانی برادری پاکستان آ زور شاغِر کہ او بلوچ چُنا تا خواننگ نا حق ئنا احترام ئے کِیر و اسکول آتے قوضہ کننگ آن پہریز کیِر۔ بلوچستان نا تینا اَسہ ثقافتی و نسلی ءُ پہچان تون اوار اَسہ قومی حیثیت ئسے ہندا خاطر آن پاکستان نا ریاست ئے تینا تاریخ، زبان و ثقافت ئے بلوچ مخلوق نا زی آ خلوی اف۔
رپوٹ ئٹی بلوچستان نا خواننگ نا بد حال انگا حالیت کِن بلوچستان نا حوالہ ٹی پاکستان نا کالونیل پالیسی تے ذمہ دار کننگانے ۔ ’’ بلوچستان ئٹی پاکستانی ریاست و بلوچ مخلوق نا رشتہ قوضہ گیر و محکوم نا ئے۔ ریاستی پوج زور ئٹ بندغی حق آتا خلاف ورزی ئے کننگ ئٹی ئے داڑان بیدس مخلوق ئے خواننگ آن محروم کننگ نا کوشست مننگ ئٹی ئے۔
علاقہ نا باز انگا اسکول آک بنیاتی آسراتی تے آن محروم ءُ یا بند ءُ ، داڑان چُنا تا خواننگ بے کچ متاثر مسونے ۔
دا رپورٹ اردو و انگریزی زبان ئٹی بی این ایم نا ویب سائیٹ تے آ ھم شنگ کننگانے دادے نُم اوڑے پی ڈی ایف فائل آ ڈاؤنلوڈ کننگ کِیرے۔ رپوٹ ئٹی ضلع آوارن نا تحصیل مشکے و تحصیل آواران نا 76 بند اسکول آتا تفصیل ئے ھم تننگانے۔
بلوچ نیشنل موومنٹ نا محکمہ سماجی بہبود داڑان مُست ضلع آواران نا تحصیل جھل جاھو نا اسکول آتا حالت نا زی آ اَسہ رپوٹ ئس پیش کریسَس ، اوڑے پاکستان نا فورسز آتا کنڈ آن اسکول آتا بند کننگ و اوفتے پوجی کیمپ تیٹ بدل کننگ نا مسئلہ ئے مونا ہتنگاسَس۔
محکمہ سماجی بہبود بی این ایم نا رد ئٹ پاکستان نا پوج و ریاست نا دا وڑ آک بلوچستان ئٹی پاکستان نا نوآبادیاتی نظام نا مون ئے پاش کِیرہ و شعور ئے وے اِلّنگ نا ساف ءُ ثبوت ھم ایتِرہ۔
