بلوچ نیشنل موومنٹ جرمنی چیپٹر نا نیمہ غان بیئلفیلڈ و جرمنی نا کیپیٹل برلن ئٹی بلوچستان ئٹی نیاڑی تا زی آ ریاست نا تشدد و ماھل بلوچ نا بندی کننگ نا خلاف احتجاجی او مظاہرہ اَس اڈ تننگا۔
دا مظاہرہ ٹی نیاڑیک ، چُناک و جرمنی ٹی رہائش کروکا کارکناک اوار اسور۔ دا مظاہرہ ٹی پاکستان نا سیکورٹی فورسز آتا نیمہ غان بلوچ سیاسی کارکن آتا و ماھل بلوچ نا جبر ئٹ بیگوا کننگ نا بر خلاف نعرہ خلننگا۔
بی این ایم جرمنی چیپٹر نا صدر اصغر علی بندغ آتیتون خطاب کریسا پارے گدرینگوکا اِرا دہائی ٹی پاکستان نا پوج و ایجینسیک بلوچستان ئٹی سنگین انگا انسانی حق آتا خلاف ورزی تیٹی اوار مسونو ۔ ہزاراتا حساب ئٹی سیاسی و سماجی کارکن آتے دا حد اسکان عام اننگا شاری یعنی شہری تے مرضی آن بغیر طاقت نا زور ئٹ بیگوا کننگانے و ہزارا بندغاتے پاکستان نا فورسز آک کسفینو و خسانو۔
او پاریر یورپی یونین نا مُلک آک پاکستان نا بارسٹ تینا پالیسی تا زی آ نظر ئس شاغِر و غور کیر۔ پاکستان بلوچستان ئٹی سنگینو جرم کریسا ئے۔بلوچ آتا نیاڑی و چُناتے بغیر مقدمہ آن اذیت گاہ تیٹی تِخیک۔رشیدہ زہری ئے 13 دے بغیر جرم آن تینا ٹارچر سیل تیٹی تخا۔ سی ٹی ڈی 17 نومبر آ ماھل بلوچ ئے جبر ئٹ بیگوا کننگ آن پد اوڑا دروغ نا مقدمہ خلک و دا وخت اِسکان خبر اف اودے ہراڑے تخانے و اوڑتون انت سلوک کننگے۔
او پاریر پاکستان بلوچ سیاسی قوت آتا توار ئے بند کننگ کِن بلوچ زالبول آتے نشانہ جوڑ کرینے۔ولے پاکستان تینا ڈکوکا زوراکی ئے مونا دننگا ہچ کامیاب مفروئے۔ اونا داوڑک تینا قومی آجوئی بلوچستان نا ہلنک کِن بلوچ قوم ئے پِین زیات طاقت و قوت تروئے۔
بلوچ نیشنل موومنٹ جرمنی چیپٹر نا جوائنٹ سیکریٹری شیر حسن پارے پاکستان بلوچستان ئٹی انسانی حق آتا باز زیات خلاف ورزی ئے کننگے۔پاکستان نا پوج اَسہ دہشت گرد ءُ پوج ئسے دا 1971 ئٹی بنگلادیش ئٹی ھم انسانی حق آتا سنگینو خلاف ورزی کریسَس ہندن اینو پاکستان نا پوج بلوچستان ئٹی ذالبول آتے تینا ظلم و زوراکی تا نشانہ جوڑ کرینے۔
بلوچ نیشنل موومنٹ نا ممبر ایمان بلوچ پارے کہ بلوچستان نا مسلئہ 1948 ئٹی ھموتم شروع مَس کہ پاکستان نا پوچ دا سر زمین نا زی آ زبردستی قوضہ کرے ہمو وخت آن ہلیس اینو اسکان بلوچاک تینا آجوئی کِن جد و جہد کریسہ ءُ پاکستان ھوفتے جبر و تشدد ئٹ تورنگ نا کوشست کریسائے۔ ہیتاک ھمو وختا زیادہ خراب مسُور کہ پاکستان نا حکومت بلوچاتے غیر ضروری طاقت نا استعمال کریسا بندغاتے جبر ئٹ بیگوا کننگ، تینا عدالت آتا فیصلہ آتے نتا کیرغ آن کننگ بندغ آتے کھسفنگ و سزا تننگے شروع کرے۔
او پاریر بلوچستان ئٹی انسانی حق آتا خلاف ورزیک خطرناکو موڑ ئسیا رسینگانو۔ پاکستان نا پوج و ڈکوکنگا ادارہ غاک ہزارہا بلوچاتے کھسفینو و بیگوا کرینو، اوفتے اذیت تننگانے و اوفتا خاندان والاتے ھم دھڑکو تِسونو۔
سوشل میڈیا نا گرم جوش انگا کارکن ھداھیر الہی پارے بلوچ ذالبول آتے و ننا ایلمُ آتے بلوچ قومی آجوئی نا جہد ئے ختم کننگ کِن جیل آتیٹی شاغنگانے۔ ولے دا قوضہ گیر زیات ہُرے اسکان بلوچستان ئٹی تینا قوضہ اے توننگ کپک۔
او پارے بلوچستان ئٹی بھلو وختس ئسے آن انسانی حق آتا خلاف ورزی مسونے ہندا خلاف ورزی تا بنیات ئے ہُرِسا اقوام متحدہ ئے بلوچستان ئٹی مداخلت کروئی ئے و یورپی یونین ئے پاکستانی پوج ئنا مدت ئے بند کروئی ئے۔
