ایمسٹرڈیم : بی این ایم نیدر لینڈ چیپٹر نا نیمہ غان بلوچستان ئٹی انسانی حق آتے نت تا کیرغ آن کننگ و چنا و ذالبُول آتے جبر ئٹ بیگواہ کننگ نا خلاف نیدرلینڈ نا شار ایمسٹر ڈیم اسکوائر ئٹی احتجاجی ءُ مظاہرہ ئس اڈ تننگا دا ٹی پارٹی نا کُھل کارکن آک شرکت کریر۔ بازار ئٹی پمفلٹ بشخنگا و اوفتے باز آ جاگہ تا ھم خلننگا۔
مظاہرین آتون خطاب کریسہ بی این ایم ہالینڈ چیپٹر نا بشخ جمال بلوچ پارے مہذب دنیا ئے بلوچستان ئٹی انسانی حق آتا خلاف ورزی، نرینہ ، چنا و ذالبول آتا جبر ئٹ بیگواہی نا برخلاف توار چست کروئی ئے۔ یورپی یونین نا مخلُوک تینا نمائندہ تَان سوال کِیر کہ او ارا حوالہ ٹی دا دہشتگرد اننگا ملک ئے کمک کننگ ءُ ۔ دا وخت آ بلوچستان ئٹی ہردے نرینہ، چنا و ذالبُول آتے پاکستانی فورسسز آک جبر ئٹ بیگوا کننگ ءُ ۔ نن یورپی یونین ، انسانی حق آتا ادارہ غاتان اپیل کینہ کہ او بلوچستان ئٹی بلوچ نسل کشی نا حساب ئے ہلیر۔
بی این ایم ہالینڈ نا ممبر اسلام مراد تران کریسہ پارے کہ پاکستان نا فورسز آک مُست نرینہ آتے جبر ئٹ بیگواہی نا نشانہ جوڑ کریرہ ولے داسا مننہ سالان چنا ؤ ذالبُول آتے تینا جبری بیگواہی نا شکار کننگ ئٹی اے۔ بلوچستان نا علاقہ ھوشاب ئٹی بلوچ ذالبول نور جان یے دروغ نا کیس ئسے ٹی بندی کرے۔ پاکستان نا فوج اَسہ منصوبہ سیٹی بلوچ نا ذالبول یے نشانہ کننگ ئٹی ئے، 3 فروری آ بلوچستان نا شار شال آن رشیدہ زھری ئے اونا چنا تیتون اوار جبر ئٹ بیگواہ کرے او بغیر جرم آن سینزدہ دے پاکستان نا ٹارچر سیل تیٹی بندی مَس۔ داسہ پاکستان نا فورس شال آن ماھل بلوچ ئے چنا تیتون اوار جبر ئٹ بیگواہ کرے، او داسکان پاکستانی ٹارچر سیل تیٹی اذیت کُننگ ئے انسانی حقوق نا ادارہ غاک بلوچستان ئٹی انسانی حق آتا خلاف ورزی نا سختو حساب ئس ہلیر اوڑان مُست کہ باز ہُرے مف۔
مظاہرین تَان خطاب کریسہ بی این ایم نا ممبر نبیل بلوچ پارے نن اینو دا خاطر آن داڑے اَسہ جاگہ غا مسونن کہ دنیا بلوچستان ئٹی بلوچ نسل کشی نا زی آ توار بُڑز کے۔75 سال نا سے بلوچستان ئٹی پاکستان نا فورسز آک بلوچ نا نسل کشی کننگ ئٹی ءُ ۔ ہزار آتا حساب ئٹ نرینہ، چنا ؤ ذالبول آتے جبر ئٹ بیگواہ کننگانے ۔دا وختا بلوچستان ئٹی جبر ئٹ بیگواہ مروکا بندغ آتا اُرا والاک ہڑدے احتجاج کننگ ءُ ۔ نن خوانہ کہ عالمی برادری بلوچستان ئٹی انسانی حق آتا خلاف ورزی تا نوٹس ئے ہلے۔بلوچستان ئٹی پاکستان نا فورسز آک ہڑ دے شاری یعنی شہری و کُل حق آتا خلاف ورزی ئے تینا ہڑدے نا کاریم جوڑ کرینے۔ ہزار آتا حساب ئٹ بلوچ آک پاکستان نا ڈھکوکا بندی جاگہ غاک یعنی ٹارچر سیل تیٹی بند ءُ اراڑے اوفتے غیر انسانی تشدد کننگ ئٹی ءُ ۔ ہلنگ نا وختا سزا تننگ آن ہزار آ بندغ آک شہید مسونو۔ ہزار آتے “خلنگ و کسفنگ “ نا پالیسی نا نشانہ جوڑ کننگانے۔
او پارے نن کُھل انسانی ادارہ غاتَے و مہذب دنیا آن دا خواست ئے کینہ کہ او بلوچستان ئٹی مقامی باشندہ غاتیکن توار چست کیر۔ ننے نسل کشی آن محفوظ کیر و ننا آجوہی ئے اسہ وار واپس ننے ہلننگ کِن ننا مدت و کمک ئے کیر۔
