بلوچ نیشنل موومنٹ برطانیہ ہنکین پاکستانی لشکر نا دو آن بلوچ الس ئنا زوراکی ئٹ بے گوائی نا بر خلاف لندن ئٹی برانزی مچی ئس کرے۔
برانزی مچی برطانوی وزیر اعظم نا اُرا نا مون آ کننگا۔
بلوچ نیشنل موومنٹ یوکے چیپٹر نا کماش منظور بلوچ میڈیا غا گپ تران کریسٹ پارے کہ پاکستان ئٹی بلوچ آتے آ ظلم ہر انوکا دے تون اوار زیات مرسہ ءِ۔ تدوکا ہفتہ پاکستانی لشکر رحیم زہری ءِ اونا زائفہ تون اوار بے گواہ کرے و زمان بلوچ ءِ کیچ آن بے گواہ کننگا۔تدوکا نن اوفک بی این ایم نا سروک باسک حسن بلوچ نا ملخڑ ءِ بے گواہ کریر۔ دا بیرہ چندی مثیل او،ہڑدے پاکستانی لشکر معصوم بلوچ زالبول و چنا تے لٹ و کٹ نا نشانہ کننگ ءِ ۔جہانی برادری بلوچستان ئٹی ظلم آتے توننگ کن پاکستان نا برخلاف زوت ایکشن ہلے۔
ورلڈ سندھی کانگریس نا ڈاکٹر لکھو لوہانہ میڈیا غا گپ و تران کریسٹ پارے کہ پاکستان بلوچستان ئٹی بلوچ آتا نسل کشی ءِ کننگ ءِ۔
ہرا دے آن پاکستان بلوچستان آ قوضہ کرینے،ہزار آ بلوچ آتے کھسفینے و ہزار آ بلوچ آتے بے گواہ کرینے۔
جہان ءِ بلوچ آتے رکھنگ نا بکار ءِ،ڈکھ و غم نا دا وخت آ سندھی قوم تینا بلوچ ایلم قوم ئتون اوار سلوک ءِ تانکہ جہان ءِ پان کہ دا بندغی نا برخلاف ڈوہ ئسے اندا سوب آن بلوچ و سندھی الس ءِ رکھنگ نما فرض ءِ۔
بی این ایم یوکے نا باسک جاسم بلوچ پارے کہ اینو نن داڑے بلوچستان ئٹی پاکستانی لشکر نا ظلم ئنا زیات مننگ نا برخلاف مچ مسونن۔پاکستان بلوچستان ئٹی پاکستانی معصوم زالبول و چناتے تینا مون بے گواہ کننگے و کھسفنگ ءِ۔بندغی حق آتا جہانی تنظیم و جہانی برادری ءِ پاکستان نا احتساب ءِ کروئی ءِ۔
