معزز اِنگا بلوچ آک!
ریاست نا دہشتگردی بلوچستان ئے سیاسی، سماجی، معاشی،تعلیمی و بندغی بحران نا بشخ کرینو۔بلوچستان ئٹی دنو طبقہ ئس اف کہ او ریاست نا دہشتگرد انگا پالیسی تا گواچی مف۔ جبر ئٹ بیگواہی،دروغ نا مقابلہ تے ہلیس مُچی نا سزاک بندغ آتا زندگی ئے بھاز سخت گَٹ کرینو۔ اگہ بندغ آتا بحران ئے ہورِس تو جبر ئٹ بیگواہی تے بلوچ نوجوان آتون اوار زالبول و چُناک ھم بچِتنو۔ فوجی آپریشن آک اُراتا ہُشنگ آک بلوچ مخلوک ئے لڈ و بار کننگ ئے مجبور کرینو۔ بلوچستان ہندنو ویل ئسے نا گواچی ےے داڑا چُپ مننگ بحثیت ِ اَسے قوم ئسے نا نن کِن بھلو جرم ئسے۔
محترم اِنگا بلوچ خواجہ غاک !
تعلیم نا زی آ اگہ نظر ئس شاغِن تو ہندُن خبر تمک کہ بنیاتی آ تعلیم و تربیت نا مرکز یا کہ ارے بند ئے یا سہولت آتان محروم ئے یا فوجی تا قوضہ ٹی ئے، معاش نا حالیت و کُبینی بلوچ مخلوک نا زندگی ئے بے وڑ کرینے، باڈر تا بند مننگ، ٹوکن سسٹم و دریاب ئٹی ٹرالر تے ہتِنگ مچھی تا باز اِننگا نسل آتے خلاس کرینو و ماہی گیر تیکِن شکار ہچس سلیتنے ہندا وجہ آن مچھی ہلوک آک اینو تینا اِرغ کِن محتاج مسونو۔
توانائی نا ذریعہ غاک آتا وے مننگ آنن زمیندار آک محتاجی نا زند ئے تدیفسہ ءُ و سرکار نا ملازم آک تینا تنخواہ تان ھم محروم کننگانو۔
بلوچ زمین نا وارث آک !
دا کُل حالیت نا ذمہ وار ریاست پاکستان و نام نہاد اننگا حکومت بلوچستان ئے ہمو کہ بلوچ دشمن پالیسی تے ہر وڑ او پائک منّک تا و قوم دشمنی نا فیصلہ تے بلوچ مخلوک نا زی آ شاغک ہندا سوب آن بلوچستان اینو اَسہ بحران ئسے آن تدینگیسہ ئے ۔
اَمرو چاگِڑد ئس مرے اوٹی بندغ آتیکِن سیاست و سیاسی اِنگا عمل بھلو اہمیت ئس تخِک۔
سیاسی اِنگا پارٹیک بندغ آتا مذاج آتا وڑ ئٹ پالیسی جوڑ کیرہ و اوفتا عمل کیرہ ولے پاکستان نا ریاست تینا مشینری ئے استعمال کریسا بلوچستان نا آجوہی کِن جہد کروکا پارٹی بلوچ نیشنل موومنٹ نا زی آ غیر اعلانی اُو پابندی و بلوچستان نا اسٹوڈنٹ آتا تنظیم بلوچ اسٹوڈنٹس آرگنائزیشن آزاد ئے کالعدم کرینے، او بلوچ سماج ئے سَنٹ کننگ نا کوشست ئس کرینے۔ پارٹی و تنظیم آتا سد آتا کچ لیڈر و کارکُن آتے شہید و ہزار آتا کچ ئٹی جبر ئٹ بیگواہ کرینے او ہندا بندغی آ بحران ئے دنیا آن ڈھکنگ خوائک کہ دا دنیا نا مونا پاش مف۔
معزز اِنگا بلوچ آک !
دا بندغی نا بحران نا خلاف بلوچستان ئٹی آجوئی کِن جہد کروکا پارٹی بلوچ نیشنل موومنٹ اَسہ مہم ئس چلایفنگ نا اعلان کرینے، دا مہم ئٹی باز اِنگا محکمہ جات آک ( محکمہ انفارمیشن ، محکمہ انسانی حقوق ، محکمہ سماجی بہبود ، محکمہ خارجہ ) اَسہ ساف او مہم ئس چلائفنگ خوائک داڑن بلوچستان نا بحران دنیا نا مونا اَسہ جوانو وڑ ئسیٹی پاش مرے و تخنگے و دا بحران آن بلوچ مخلوک ئے خلاص مننگ کِن دنیا نا ضمیر ئے بَش کننگ ئے و پاکستان نا دروغ آتے و اصلیت ئے دنیا نا مون آ پھاش کننگ کن کمک اَس مِلُے۔
بہادر اِنگا قوم ئنا بہادر اِنگا چُناک !
بلوچ نیشنل موومنٹ اَسہ قومی اُو امانت ئسے اونا روتہ غاک بلوچ مخلوک ئٹی پیوست اُو۔بلوچ نیشل موومنٹ نا مسخت اَسہ آجو و خوشحال اُو ریاست ئسے نا اڈتننگ و دانا آجوئی و خوشالی اے توننگ نا وعدہ ئے کرینے ۔
بلوچ نیشنل موومنٹ نا مہم نا مسخت دا ھم ارے کہ بلوچستان دا بحران آن پیشن مرے و بلوچ اَسہ مہذب او قوم ئسے نا وڑ ئٹ تینا زند ئے گدریفِے۔ بلوچ نیشنل موومنٹ دا مہم ئے کامیاب کننگ نا خاطر آن بلوچ مخلوک ، طالب علم ، سوشل میڈیا ایکٹیوسٹس ، سیاسی تنظیم ، سیاسی پارٹی تیتون اوار ایلو کُھل طبقہ ِ فکر آن خواست کیک کہ او دا مہم ئٹی بشخ ہلیر و دا بحران نا خلاف توار چست کیر انتے کہ دا مہم نا کامیابی بلوچ مخلوک و بلوچ چاگِرد نا کامیابی ئے۔
