شال : بلوچ نیشنل موومنٹ نا بندغی حق آتا ادارہ پانک نا رپوٹ نا رِد ئٹ فروری 2023 ئٹی بلوچستان ئٹی 39 بندغ جبر ئٹ بیگوا کننگانے و اَسِٹ پاکستان نا فوج ئنا تشدد آن بیران مس۔
جبر ئٹ بیگوا مروکا تیٹی اِرا زالبول ماھل بلوچ و رشیدہ بلوچ ھم اوار اسُر دافتیٹی رشیدہ زھری اے یلہ کننگانے ولے ماھل بلوچ ئے دروغ نا کیس تیٹی پولیس نا کاؤنٹرٹیررازم ڈیپارٹمنٹ دسکا تورینے۔
پوجی اہلکار آتا دُو آن تشدد کننگ آن پد کہوکا بندغ داد بخش ولد مسکان ئے پاکستان نا فوج اودے آرمی نا کیمپ آ خواہفے اوڑے تشدد کرے داڑن او باز ٹپی مس پدا ہندا دڑد آتے وے سگننگ نا سوب آن بیران مس۔ او گیشکور ضلع آواران نا ہندی ئس اَس۔
فروری ٹی 13 بندغ جبر ئٹ بیگوا کننگ آن پد سخت ذہنی و بدنی شدد کننگ آن پد یلہ کننگار۔
پانک نا رپوٹ ئٹی سرورق آ پاکستانی فورسس آتا دُو آن جبر ئٹ بیگوا مروکا زالبولاک ماھل بلوچ و رشیدہ بلوچ نا فوٹو تیتون اوار امیراں بی بی نا فوٹو ھم خلوک ئے۔
امودے کہ پاکستانی حکومت نا وزیر عبدالرحمان کھیتران کھسفنگ آن پد تیزاب چٹ تس و خسا ہرانا ہچ مون ہم درست متو۔امیراں بی بی تون اوار پین پنچ بندغ آتا جوناک خسنگار داڑن بلوچستان ئٹی سخت او رد عمل ئس مونا بس اموڑن عبدالرحمان گرفتار کننگا۔
پانک ئنا نیمہ غان رپوٹ تون اوار بیان ئسیٹی پاننگانے کہ فروری ٹی پاکستان نا فوج بلوچستان ئٹی جبر ئٹ بیگواہی تیٹی زیاتی ہیسُنے زالبول آتے ہم جبر ئٹ بیگوا کریسا ئے۔جبر ئٹ بیگوا مروکا ماھل بلوچ اے پاش کرینے و اوڑا سنگین او الزام خلکُنے۔
رپوٹ ئٹی پاننگانے کہ گدرینگوکا اِرا دہائی آن ایمن اننگا بندغ آتے ہلنگ آن پد بیگوا کننگ نا کاریم ہم شروع کننگانے اوفتے ارا کیس یا قانود ئٹ بندی و جبر ئٹ بیگوا کننگک داڑے حکومت پاکستان و صاحب ِ اختیار آک چُپ ءُ ۔ایمن اننگا شاری تے جبر ئٹ بیگوا کننگ و بغیرس عدالت ئسے آ پیشی آن اوفتے تشدد کننگک دا کُل بندغی حق آتا سنگین او خلاف ورزی ءُ ۔
پانک نا رِد ئٹ بلوچستان ئٹی بندغی بحران ئس ودی مسونے ہرافتے تنظیم آک پاش کننگ ئٹی ءُ ولے داڑن بیدس ہچکس خف تورنگ ئٹی اَف ہندا سوب آن پاکستان نا فوج زیات دیدہ دلیری ئٹ ایمن اننگا بلوچ آتا حق اے خلنگ ئٹی ئے و نت تا کیرغ آن کننگ ئٹی ئے ۔
اگہ جہانی ادارہ غاک و بندغی حق آتے کِن کاریم کروکا تنظیماک پاکستان ئے جوابدہ کتور تو بلوچستان ئٹی بندغی حق آک باز پین وڑ ءُ شکل ئس اختیار کرور۔
پانک دا درخواست ئے کرینے کہ بلوچستان ئٹی پاکستان نا دا جرم ئے تورنگ کِن اقوام متحدہ تون اوار ایلو ادارہ غاک عملی او قدم ئس ہرفنگ کِن مون آ بریر۔
