شال: بلوچ نیشنل موومنٹ نا سماجی بہبود بلوچستان ئٹی تعلیمی حالت نا زی آ تینا رپورٹ آتا سلسلہ ٹی اِرٹمیکو وار ہندا ہیتے پاش کرینے و پارینے کہ ضلع اے خضدار نا اِرا تحصیل اورناچ و نال ئٹی 19 اسکول بند ءُ ارافتیٹی بازنگا اسکول تے پاکستان نا پوج تینا قوضہ ٹی کرینے و اوفتے تینا پوجی کیمپس جوڑ کرینے دافتیٹی 11 اسکول ہندُنو اَریر کہ اوفتیٹی بُنیاتی سہولت نہ مننگ نا وجہ آن چُناک جوانو تعلیم حاصل کننگ آن باز مُر ءُ ۔
رپوٹ نا رد ئٹ تحصیل اورناچ نا مار تا پرائمری اسکول تیروکنڈ، پرائمری اسکول بیرونٹ ، پرائمری اسکول چب ، پرائمری اسکول کلی ولی خان ، پرائمری اسکول ڈل، پرائمری اسکول جنی ، پرائمری اسکول نیدو دمب و پرائمری اسکول دمب گدرینگوکا بھازنگا سال آتیان بند ءُ ۔
تحصیل اورناچ ئٹی 11 ہندُنو اسکول اَریر ہرافتیٹی بنیاتی تعلیم نہ مننگ نا برابر ئے ڈیسک و درسی کتاب آتان بیدس ہچو گڑاس اف اراڑن تعلیم مونا کائے دافتیٹی ہائی اسکول کھن ، پرائمری اسکول کھن ، گرلز پرائمری اسکول کھن ، مڈل اسکول کھن ، پرائمری اسکول کولی ، پرائمری اسکول دودا بازار ، پرائمری اسکول ملازئی چکلی ، گرلز پرائمری اسکول چکلی ، پرائمری اسکول الم خان و پرائمری اسکول سرداری بینٹ بنیاتی سہولت آک نہ مننگ نا سوب آن دا کُل ہندُنو اسکول ءُ داڑے طالب علم آتے کلاس ہلننگ آ ھم باز اڑ ءُ جنجال پیش مریک۔
ضلع خضدار نا تحصیل نال نا یونین کونسل کودہ ٹی 11 ہندُنو اسکول ارے ارافتیٹی بھاز آتے پاکستان نا پوج قوضہ کرینے و اوفتے تینا کیمپس جوڑ کرینے و دا اسکول آک اینو دے اسکان پورو بند مسونو گڑاس اسکول تیٹی بُنیاتی سہولت آتا نہ مننگ نا وجہ آن اڑ و جنجال بھاز قرے۔
یونین کونسل کودہ ٹی پرائمری اسکول مزاردان کوڑاسک ، کوڈ نمبر 03501, پرائمری اسکول ایکل کوڑاسک ، پرائمری اسکول کونڈی کوڑاسک ، پرائمری اسکول شھول کوڑاسک کوڈ نمبر 13241 ، پرائمری چڈکوڑاسک ، کوڈ نمبر 03503 , ھانی اسکول کوڑاسک(پوجی تا قوضہ ٹی اے) ، مڈل اسکول کودہ ، پرائمری اسکول انور آباد کودہ ، پرائمری اسکول کلی قاسم خان کودہ و گرلز پرائمری اسکول کلی قاسم خان ئٹی تعلیم حاصل کننگ ھم نہ مننگ نا برابر ئے۔
بی این ایم نا محکمہ سماجی بہبود نا رپوٹ ئٹی دا پاننگانے بلوچستان نا ایلو ضلع تا وڑ خضدار ہم پاکستان نا نوآبادیاتی پالیسی تان متاثر مسونے ۔ ظلم و جبر ، جبر ئٹ بیگواہی ، تشدد، چیروکا جونک و پاکستانی فورسس نا دروغ نا مقابلہ آک خضدار ئٹی بلوچ مخلوک نا زندگی ئے پورو تباہ و برباد کرینو۔
رپوٹ نا رد ئٹ خضدار نا تعلیم نا حالیت آ اگہ نظر ئس شاغنگہ تو ھمو ہیت مونا بریک ارا کہ ضلع آواران نا تحصیل آتا ئے۔اسکول تا بند مننگ آن طالب علم آک سخت مشکل ئٹی ءُ ۔ بلوچستان ئٹی تعلیم نا وڑاک و بلوچستان ئٹی طالب علم آتا جبر ئٹ بیگواہی نا وڑ آک و تکلیفاک بلوچستان ئٹی اَسہ خوف ئنا ماحول ئس پیدا کرینو و بلوچ نا چُناک اینو تعلیم آن محروم مسونو۔
