شال : بلوچ نیشنل موومنٹ نا جارکش بلوچ اسٹوڈنس آرگنائزیشن (آزاد) نا مُسکوئی چیئرمین زاہد بلوچ و بی ایس او نا ممبر اسد بلوچ نا زورانسری بیگواہی ئے 9 سال پورو مننگ آ تینا درشان ئٹی پارے کہ ،بی ایس او آزاد اسہ پرامن نودربر گل ئسے ارا نا چیئرمین زاہد بلوچ و ممبر اسد بلوچ ئے 18 مارچ 2014 آ بلوچستان نا مرکزی شار شال آن پاکستانی لشکر ہلنگ آن پد بیگواہ کرے ، ارادے کہ 9 سال نا بھلا مدت پورو
مننگ آن پد ہم آجو متوس و اوفتا ہچو ہال ئس تننگ متوو۔
او پارے کہ اقوام متحدہ نا ادارہ آک زورانسری بیگوائی ئے انسانیت نا خلاف جرم قرار تسونے و اونا ممبر پاکستان ہنوکا 75 سال آن بلوچستان ئٹی زورانسری بیگوائی ئے و بلوچستان ئٹی تینا زور ئٹ کروک قوضہ ئے برقرار تخنگ کہ اسہ سلاہ سینا دروشم ئٹ کارمرز کننگ ئٹی ءِ ، بی ایس او آزاد ،بی این ایم ،بی آر پی ، و ایلو سیاسی و سماجی گل آتا ہزارا ممبر آک بیگواہ ءُ ، داڑان بیدس ہم اقوام متحدہ تینا ممبر ڈیھ تے انسانیت نا برخلاف جرائم آ جوابدہ کننگ آن گریزان ءُ ،بلکہ اقوام متحدہ نا بھاز ممبر آک تو اونا کمک ئے ہم کننگو ۔
بی این ایم نا جارکش پارے کہ زاہد بلوچ اسہ متحرک ءُ بلوچ نودربر گل ئسے نا سربراہ ئے ، اراڑان بلوچ سماج آ بھلو اثرات تمانے ، بی ایس او نا تعلیمات نا بدولت بلوچ سماج ئٹی بنیاد پرستی و مزہبی انتہاء پسندی نا روتہ ہلنگ ئے مشکل آتیتو تو مون تِروئی تمانے ، ریاست پاکستانی بی ایس او نا چیئرمین ئے پابند سلاسل کریسہ بلوچ راج ئے ذہنی غلام و پسماندگی ٹی دِھکہ تننگ خوائک ، نودربر و علم ہر راج ئنا مستقبل او ہندا سوب آن ریاست پاکستان بلوچ راج ئنا مستقبل ئے تباہ کننگ کِن کُھل آن زیات بلوچ نودربر آتے زورانسری بیگوائی نا نشانہ جوڑ کننگ ئٹی ئے و ہزار آتا کچ نودربر آتے تشدد آن پد شہید کرینے ۔
او پارے کہ بی این ایم اسد و زاہد بلوچ نا آجوئی کِن انسانی حقوق نا جہانی ادارہ تیان خواست کیک کہ او دا نوجوان تون اوار پاکستانی لشکر نا زندان ئٹی زورانسری بیگواہ آ بندغ آتا آجوئی کِن مہم ئس چلّیفنگ مرے پاکستانی لشکر نا متعلقہ اوسر آتے جہانی عدالت انصاف آن سزا ایتر تانکہ مستقبل ئٹی ہچو تاغت ئسے انسانیت نا برخلاف جرم کننگ کِن کارمرز کننگ کپ و دنیا کِن اسہ مثال ئس قائم کے۔
بی این ایم نا جارکش ایسر ئٹی پارے کہ بلوچستان ئٹی انسانی حقوق نا سنگین آ صورتحال آ اقوام متحدہ و عالمی برادری نا خن ترّی آن اقوام متحدہ و عالمی قوانین آ انسانیت نا بھروسہ پنانے ، اگہ ریاست پاکستان ئے بنگلہ دیش ئٹی کروکا جرم آتا قصور وار کریسہ اونا برخلاف قدم ہرفنگ مروس و کاروائی کننگ مروس تو اینو بلوچستان ئٹی انسانی حق آتا پامالی نا جرت ئے تختوکہ ، چیئرمین زاہد بلوچ و اسد بلوچ نا وڑ انگا بےگناہ آک و پرامن آ نودربر آک ٹارچرسیل تیٹی بند متوسہ۔
