بلوچ نیشنل مومنٹ نا جارکش سانحہِ مستونگ آ بھاز رنج ءُ غم ئنا درشانی ئے کریسہ پارے کہ مستونگ ئٹی عیدمیلاد النبی نا جلوس آ تراک بلوچ راج آ براہِ راست جلہو ئسے دا کاروائی ہچو پن ئسے ئٹ قابل قبول افس ۔ اینو پورو بلوچے ماتم ئٹی ءِ، نن ہم غم ئٹی ہمو خاہوت آتے تون اوارُن ہَرافتا کہ بندغ آتے خلنگ مسُنو ۔
جارکش پارے کہ بلوچ و پشتون راج آک پاکستانی ریاستی پالیسی تا شکار ءُ ۔ پاکستان تینا جوڑ مننگ آن اینو اسکان مذہب ئے سلاہ ئسینا وڑ ئٹ کارمرز کننگے ہَرانا نتیجہ ئے بلوچستان تون اوار تیبہ غا خطہ سہنگے ۔ اینو ہم پاکستان بلوچستان ٹی مذہبی فرقہ واریت ئٹ بلوچ ئے پشتون نا وڑ کننگ خواہک تانکہ بلوچ راجی جنز ئے پد خلنگ مرے ۔
او پارے کہ بلوچ راج ئے اینو مہالو نا وخت ئنا جتا انگا محاز آتے آ جتا آ بھلا خطرہ تیتون مون تننگ و جہانی کمک و مخ تفی ضرورت ءِ ۔ پاکستانی ریاست جہانی برادری کے اسہ پیہن ءُ پیل ئس جوڑ مسُنے ہرانا غور کننگ جہان نا مفاد ئٹ اف۔ نہ کہ اسہ نا اہل او حکومت ئسے الس نا کمک و مخ تفی حاصل ئے کہ ہرانا حالیت آتون مون تننگ المی ءِ ۔
بی این ایم نا جارکش پارے کہ آزاد بلوچستان آن بیدس دہشت گڑدی نا ودفنگ ئے توننگ نا ممکن ءِ۔ مستونگ نا تدینی نہ بیرہ بلوچستان کن بلکہ تیبہ غا راج اکِن اسہ خرابو حوال ئسے ۔
او پارے کہ بلوچستان تینا جغرافیائی اہمیت نا لحاظ ئٹ جتا آ تاغت آتے کے پرکشش ءِ و ریاست پاکستان بلوچ راجی جنز ئتون مون تننگ آن ناکامی آن پد وڑ وڑ نا سازش کارمرز کیک ۔
