بلوچ نیشنل موومنٹ نا ترجمان تینا اَسہ بیان ئسیٹی پارے کہ لیاری ٹی گینگ آتے اسہ وار پدا اسہ جہہ آ کننگ ءُ ہرا بلوچ قوم اَکِن خُلیس نا ہیت ئسے پارٹی دادے بلوچ قوم ئنا برخلاف ریاست نا چَم ئس سمجِھک انتے کہ لیاری بلوچ راجی سیاست ، علم وادب و قومی سوچ ئنا بنیات مسُنے۔ لیاری نا تباہی ، دانا منشیات فروش و گینگسٹر آتا دُو ٹی ہِننِگ آن بلوچ قوم بھاز بَھلو تاوان ئسینا کنڈ آ ہِنو۔ لیاری ٹی پاکستانی فورسز آک مُست منشیات فروش آتا سرپرستی ءِ کریرہ دانا امن ءِ تباہ کریر و پدا باز آ گروپ آتے طاقتور جوڑ کریر اوفتے تینا سیاسی مسخت کِن کارمرز کریر۔ پاکستان پیپلز پاٹی ہم منشیات فروش آتا طاقت ءِ تینا اقتدار کِن کارمرز کرے داڑن بیدس پاکستان نا خفیہ ادارہ غاک منشیات فروش آتے بلوچ قوم دوست آتا برخلاف کارمرز کریر۔ دا ہیت ساف ءِ کہ پاکستان نا سیاسی جماعت آک و ریاست منشیات فروش آتے ختم کننگ آن بیدس اوفتے تینا فائدہ کِن کارمرز کیرہ۔
او پارے کہ ہراتم خاص اِنگا سیاسی مسخت آتے و کراچی ٹی پیپلز پاٹی نا طاقت ءِ ایلو نیمہ آ دننگ نا ضرورت مس ہموتم کراچی ٹی اوفتا زی آ آپریشن کننگا ہراڑان سد آتا کَچ ئٹ نوجوان آتے بیدِس عدالتی حکم ئسے آن گرفتار کننگ آن پد کھسفنگا و اوفتا جون آتے خسنگا۔
ترجمان پارے کہ ریاست سیاسی مسخت کِن آپریشن کرینے ولے پنی آ گینگسٹر و جرم کروکا بدنام آ بندغ آتے کھسفنِگ آن لیاری و ملیر ئٹی مخلوک آک آرام ئٹ دم کشنگ اسُر۔ کراچی نا بلوچ علاقہ آک تینا سیاسی ، ثقافتی گوازی و ایلو صحت مند آ کاریم تا کنڈ آ بریسہ اسُر اسہ وار پدا منشیات فروش آک و گینگسٹر آک کاٹم ہرفِنگ ئٹی ءُ۔
او پارے بلوچ قوم ءِ کُل آن مُست تینا صف آتے سدھا کروی ءِ لیاری ٹی اَسہ مضبوط ءُ اتحاد و یک جاگہی ئٹ دون انگا بندغ آتا خلاف توار بڑز کروی ءِ۔ لیاری نا نصیب تہاری تیٹی تُولنگ آن بیدِس ہچ اَف اودے قوم نا جوڑنگ تون اوار قومی ذمہ واری و دا چیلنج آتا برخلاف ہر پُوسکُنا سازش آن تینے بچِفوئی ءِ۔
ترجمان پارے کہ گیدرینگوکا ہفتہ پاک کالونی پرانا گولیمار ئٹی ریاست جدگال نا گروپ یاسر ، نعمان سندھی و سرتاج و جمیل چھانگہ گروپ نا محمد بخش ، ماجد و نوید عرف کپی تون سلاہ نا جنگ ئٹی کسر ئٹ اِنوکا طاہر جدگال مرک ئنا گواچی مس۔ اسلام محلہ ، لیاری ، کلاکوٹ نا تولوک یاسین ولد نیاز احسن پنی آ منشیات فروش محلہ ٹی منشیات بہا کننگ آن منع کِننگ آ کھسفِک۔ دا واقع آتا خلاف لیاری نا عوام کُل برانز کریر اوفتا توار تون نن تینا توار ءِ اسِٹ کینہ دا ہیت نا زی آ زور شاغِنہ کہ گینگ وار و منشیات فروشی ءِ داڑے توننگ زلوری ءِ۔
او پارے کہ مروکا ہڑتوما واقعہ آتیٹی کھسِفوک نامعلوم او بندغ ئس اَف بلکہ مقامی انتظامیہ، سرکار و پولیس دافتا بارِسٹ جوان چائک۔ بلکہ دا بندغ آتے پولیس نا سرپرستی ہم ارے ہندا وجہ آن دا بے خُلیس منشیات نا کاروبار کیرہ و داسہ منشیات نا بہا ئٹی پین گینگ وار شروع مننگ ءِ۔ سوچنگ نا ہیت دادے کہ نوجوان نسل بے خیالی نا شکار مریسہ جرم ئنا دنیا ٹی چرینگِک ہَرا بروکا نسل اَکِن باز بھلو خطرہ ئسے۔
