بلوچستان لبریشن فرنٹ نا جارکش میجر گہرام بلوچ پارے کہ 22 فروری 2023 آ کمانڈر میجر محمد کریم عرف مُلا بہرام نا بلُنی ٹی بی ایل ایف نا سرمچار آتا اسہ بشخ اس دے ئنا 2:30 بجہ آ کیچ،مَنْد ئنا ہند موکندر و دوکوپ نا درمیان ئٹی قوضہ گیر پاکستانی لشکر نا چار لاری تا اسہ قافلہ ئسے راکٹ و آٹومیٹک سلاء تے ئٹ جلہو کریر لاری تیٹی سوار دشمن لشکر نا ہفت کارندہ کھسکُر و کیہیک ٹپی مسُر ۔ جلہو ئٹی دشمن لشکر نا لاری تے ہم بھاز نسخان رسینگا۔ سُہبمَنْد جلہو آن پد سرمچاراک مزنبند نا مشی ہند ئٹی پدا سر مسُر۔
جلہو نا رد عمل ئٹی پاکستانی قوضہ گیر لشکر اسہ زمینی و فضائی آپریشن اس بنا کرے و ایلو دے سہب ئنا مہالہ سرمچاراتا ٹھکانہ تا ڈرون ئنا زریعہ ئٹ میزائل خلک ہراٹی کمانڈر میجر محمد کریم عرف مُلا بہرام ولد حاجی شے محمد گوبرد مَنْد ئنا ہندی، حزّا عرف میرل ولد محمد صالح گوک مَنْد ئنا ہندی، لیفٹننٹ طالب عرف کمانچر ولد یاسین مہیر مَنْد ئنا ہندی، جلال عرف برمش ولد حسن تلمب مَنْد، شہزاد عرف چراغ ولد مولا بخش ساکن گومازی تُمْپ، آصف عرف جنید ولد ہیبتان درچکو دَشْت ئنا ہندی ہمو جاگہ غا شہید مسُر و لیفٹننٹ منظور عرف کیا ولد شفیع محمد بلوچ آباد مَنْد ئنا ہندی ،مولا بخش عرف غفار ولد کریم بخش درچکوہ دَشْت ئنا ہندی ٹپی مسُر و کیہی گھنٹہ اسکان دشمن توں مقابلہ کریر ولے ٹپی مننگ نا سوب آن پیش تمنگ کتور و ایسر ئٹ شہید مسُر۔ سنگت آتا حفاظت کن اِرا سرمچار اوفک سلامت مسُر و قوضہ گیر لشکر نا زمینی بشخ اتون بلو جھڑپ ئسے آن پد گھیرہ ءِ پرغنگ ئٹی سُہبمَنْد مریسہ تنظیمی سنگت آتا رئی آ سر مسُر۔
شہید کمانڈر میجر مُلا بہرام اسہ بہادر و آزمودہ کار ءُ سرمچار اس اسک ہرا 2008 ئٹی اسہ سرمچار ئسینا حیثیت ئٹ بی ایل ایف ئٹی اوار مس۔ اوفک ریجنل کمان کونسل نا باسک ئسینا لحاظ ئٹ کیہی سال اسکان مَکُّران ئٹی سرمچار آتا رہشونی و تُربَیت نا فرض آتے سرجم کریسہ اسک۔ اوفتا قابلیت و تجربہ نا بدولت اوفتے 2019 ٹی تنظیم اسہ کیمپ کمانڈر نا ذمہ واری ءِ تس ۔ اوفتا بلُنی ٹی کیہی وار سرمچاراک دشمن ءِ بلو بلو نسخان تسونو۔ یاتی مرے میجر محمد کریم عرف مُلا بہرام بلوچستان نا جتا جتا انگا ہند آتا جنگی محاذ آ تیٹی اوار مسونے۔
شہید حزّا عرف میرل 2017 ٹی اسہ سرمچار ئسینا لحاظ ئٹ بی ایل ایف ئٹی اوار مس و شہر ئنا نیٹورک ئٹی کاریم کرسہ مسونے ۔ اوفک 8 اگست 2022 ئٹی کیمپ آ بسُر اوفک اسہ بہادر و آمودہ کار ءُ سرمچار اس اس۔
شہید لیفٹننٹ منظور 2013 ٹی بی ایل ایف نا صفہ تیٹی اسہ سّرمچار ئسینا لحاظ ئٹ اوار مس۔ اوفتا بہادری و ہنرمَنْدی نا سوب اوفتے لیفٹننٹ نا ذمہ واری تننگا۔
شہید لیفٹننٹ طالب عرف کمانچر 2008 ئٹی بی ایل ایف نا صفہ تیٹی اوار مس و تنظیم توںلن اونا ہُرے نا اواری و رہشونی نا صلاحیت آتا بدولت اوفتے اسہ لیفٹننٹ ئسینہ ذمہ واری تننگا۔
شہید جلال جان عرف برمش 6 مئی 2021 آ بی ایل ایف ئٹی اوار مس ۔ اوفک اسہ پرجوش، بہادر و محنت کروکو سرمچار اس اس۔
شہید شہزاد عرف چراغ 9 اکتوبر 2022 آ بی ایل ایف ئٹی اوار مس و اسہ سرمچار ئسینا لحاظ ئٹ 2013 ٹی تحریک تون اوار مس۔ اوفک اسہ تجربہ کار، محنتی و مخلص ءُ سرمچار اس اس۔
شہید آصف عرف جُنید 1 دسمبر 2022 آ بی ایل ایف ئٹی اوار مس و اسہ سرمچار ئسینا لحاظ ئٹ اوفک 2014 آن آجوئی نا تحریک ئٹی کاریم کننگ اس۔ او اسہ تجربہ کار و بہادر ءُ سرمچار اس اس۔
شہید مولا بخش عرف غفار 2021 آ بی ایل ایف ئٹی اوار مس و 2017 آن اوفک آجوئی نا تحریک ئٹی جتا جتا انگا جنگی محاذ آ تیٹی خدمت کرینے او اسہ بہادر و آزمود کار ءُ سرمچار اس اس۔
بی ایل ایف بلوچ راجی آجوئی کن کمانڈر میجر محمد کریم عرف مُلا بہرام و شہید مروکا سنگت آتا جدوجہد، کمٹمنٹ و قربانی تے قدر ئنا نظر ئٹ ہُرک ،اوفتے خراج عقیدت ندر کیک و دا قول ءِ دوارہ پائک کہ بلوچستان نا آجوئی اسکان شہیداتا مشن ءِ برجاء تِخو۔
