بلوچستان لبریشن فرنٹ نا جارکش میجر گہرام میڈیا ٹی شینک مروکا درشان ئٹی پارے کہ سرمچاراک پْروم ئٹی پاکستانی لشکر نا اسہ اہم ءُ ایجنٹ و ڈیتھ اسکواڈ نا بھلا فقیروک ولد پیر محمد پْروم نا ہندی ءِ اونا مُسہ ہمراہ تون اوار خلیسہ اوفتا توفک آتے ہرفیر۔
سرمچاراک خفیہ حوال رسینگ آ تدوکا شام پْروم نا ہند بسد ئٹی قوضہ گیر ریاست نا ایجنٹ و ڈیتھ اسکواڈ نا سربر فقیروک آ موہان سنگر ہلیسہ جلہو کریر۔ ہندا ریاستی ایجنٹ ہرا چار لاری تا قافلہ تون اوار اَس، سرمچاراک بھلا و پوسکُن انگا سلاء تیئٹ دافتا زی آ جلہو کریر۔ دا جلہو ئٹی فقیروک تینا مُسہ کارندہ آتون اوار خلنگا و اونا منہ کارندہ ٹپی حالت ئٹی نرنگ ئٹی سُہبمَنْد مسُر۔
سرمچاراک ریاستی ایجنٹ آتان اسہ ایل ایم جی،آر پی جی ، جی 7 ، ارا کلاشنکوف ہرفیر و اوفتا لینڈ کروزر لاری ءِ ہُشار۔
فقیروک اسہ مدت ئسے آن ڈیتھ اسکواڈ و ریاستی ایجنٹ نا کردار ءِ ادا کننگ اسک ۔ اود پْروم،پَنجْگُور، بُلیدہ و بالگتر و ہیب کھیب ئٹی کاریم کننگ اسک۔ اوفک کیہی سرمچاراتا مخبری و پاکستانی لشکر تون جرم آتیٹی اوار اسک۔ اود لٹِنگ و منشیات فروشی تون اوار کیہی چاگڑدی خرابی تیٹی اوار اسک و اودے دشمن لشکر تیبہ آزادی تِسَس۔
ریاستی ایجنٹ داکان مُست اسہ مسلح تنظیم ئسینا باس اسک۔ پاکستانی لشکر نا مونا سرنڈر کننگ آن پد اودے ہندی ڈیتھ اسکواڈ نا بھلا کریر۔ اود ریاست نا پاننگ آ سرمچاراتا خاہوت اوفتا رشتہ دار آتے دھمکی تننگ ئٹی اول اسک۔
اود بلوچستان ئٹی پاکستانی لشکر نا نسل کشی نا پالیسی ٹی شریک جرم اسک۔ دننگا مجرم آتے سزا تننگ ننا راجی ذمہ واری ءِ و جہانی قانونی آتا مطابق درست ءِ ۔
ریکارڈ ئٹی ارے کہ ریاستی ڈیتھ اسکواڈ نا بھلا ءِ اسہ اوار تُربَت پولیس دزگیر کریسَس ولے زوت اودے ہمراہ و سلاء تیتون یلہ کننگا۔
دا وڑ نا باز انگا بندغاک اریر ہرافتے مڈی نا لالچ تریسہ بے وقوف جوڑ کننگا۔ ہرافک کم عقلی ئٹ ریاستی ایجنٹ آتون اوار ءُ ۔ فوج ئنا کالخواک اوفتے بلوچ جہد ئنا بر خلاف کارمرز کننگ ءُ ۔
تنظیم اوفتے اسہ موقع ئس ایتک کہ اوفک راجی عدالت ئٹی بریر تینا صفائی تے پیش کیر و ایلو اُلس ئنا وڑ زندگی گداریفیر۔ دا جنگ قوضہ گیر دشمن ریاست نا برخلاف ءِ اوفک داٹی فریق مفس۔
نن اُلس آن خواست کینہ کہ اوفک ریاستی لشکر و اونا ڈیتھ اسکواڈ آن مُر مریر و اوفتون کُمک آن پہریز کیر ۔
پْروم،بُلیدہ زامران نا مشی ہند آتیٹی شکار نا زی آ پابندی ءِ ، الُس ئنا بندغاک شکار کن ہنپس انتئیکہ ریاستی ڈیتھ اسکواڈ شکار نا پن ئٹ سرمچار آتا مخبری ءِ کیرہ۔
