ریڈیو زْرمبش براہوئی | ریڈیو زْرمبش براہوئی,Balochistan-liberation-front,BLF,Paid-rich-tributes-to-martyrs,Of-baloch-sarmachars

بلوچستان لبریشن فرنٹ نا سرمچار آتا ہژدہ مارچ آ قوضہ گیر لشکر تون اسہ خونی او جھڑپ ئس مس ہراٹی مسہ سرمچار شہید مسر۔

دا جھڑپ ئٹی دژمن لشکر نا کیہی کارندہ غاک بیران و ٹپی مسر۔

آواران نا زرباری مش تا لڑ ئٹی گشت ئنا وخت آ دژمن لشکر تون جھڑپ مس۔دا خونی جھڑپ ئٹی مسہ سرمچار شہید مسر۔دا علاقہ غاتے ٹی داسا ام پاکستانی لشکر نا بے دادی برجاء ءِ۔زمینی و بالی زوراکی ٹی اسہ شوہان ئس اللہ داد بلوچ پنی او ام شہید مس ہندن اونا ایلم و مسہ پین شوہان بے گواہ کنگانے۔اللہ داد ءِ مخلص و ایماندار او بلوچ ئس مننگ نا سزا ئٹ شہید کنگا۔

شہید سرمچار آتے ٹی درمان بلوچ،ناکو محمد صالح و سبزو بلوچ اوار او۔اوفک شہید مننگ آن مست کیہی جنگ آتیٹی دژمن لشکر تون مون تریسہ کریر و دژمن ءِ بھلو نسخان تسر۔اوفتا مشن جہد آجوئی تینا مزل اسکان برجاء مرو۔

درمان بلوچ عرف دلسرد ولد مراد ہندی گورستانی آواران،2013 آن بی ایل ایف نا تلہ تون تفوک ئس و سیکینڈ لفٹیننٹ نا عہدہ آ فائز ئس۔پاکستانی لشکر فروری 2016 ئٹ کرنل کاشف نا کمانداری ٹی اسہ آپریشن ئسے ٹی شہید دلسرد و اونا سیال آتا مچا خلق ءِ خاکر ترسہ بھس کرے۔ بھاز معاشی سختی و علاقہ بدری (آئی ڈی پیز) مننگ آن بیدس اود پارٹی پروگرام و میدان جنگ ئٹ تنظیمی سنگت آتون اوار ہر وخت سلوک ئس۔اود کولواہ، آواران، بالگتر تون اوار مکران نا کیہی علاقہ غا تے ٹی دژمن نا برخلاف کیہی محاذ آتا سرمچار آتا سروکی کریسہ ئس و قوضہ گیر لشکر ءِ بھلو نسخان تسس۔

ناکو محمد صالح عرف ساربان ہندی پاھو پیری آواران،2017 غان بی ایل ایف نا تلہ غا باقاعدگی تون اوار تفوک ئس۔داڑان مست اود پارٹی تون اسہ ہمدرد ئسے نا وڑ کاریم کرسہ ئس،ولے 2017 ئٹ ہراتم پاکستانی لشکر مش تے ٹی آباد بلوچ آبادی تے تاغت نا زور آ شار آ منتقل کننگ بناء کرے گڑا ناکو شار آ اننگ نا جاہ مش تے ہنکین جوڑسہ دژمن نا برخلاف جنگ و مزاحمت ءِ اول ترجیح تس۔پیری ٹی اونا گام تے ٹی لڑزہ بتو و اود مدام ایلو سنگت آتون اوار ہم قدم و ہمسفر مس۔اود کیہی میدان جنگ آتا تیاری و سرمچار آتا ہن و بر و جنگی مڈی تا سر کننگ و گرج آتے پورو کننگ ئٹ بلو کڑد ئس ادا کرے ہرانا سوب آن جتاء جتاء ہند آتا دژمن ءِ بلو نسخان تون مون تروئی تما۔

سبرو عرف بالاچ ولد رحمت ہندی قرآن بینٹ جھل جھاؤ، آواران،2021 آن بی ایل ایف نا تلہ غا تفوک ئس جھاؤ نا جاندمی مشی لڑ ئٹ پاکستانی لشکر بھاز خونی آپریشن و خلق تے خاخر تننگ تون اوار اوار اونگان نا آبادی تے تاغت نا زور آ باوئی آ خلق آن کشا،دافتے ٹی شہید سبرو نا خاہوت ام اوار ئس۔2020 ئٹ اسہ آپریشن ئسے نا وخت آ شہید سبرو و اونا ایلم ءِ دزگیر کرسہ زوراکی ئٹ بے گواہ کنگا۔اودے کیہی توہ اسکان بھاز زہنی و جسمانی بیدادی آن پد یلہ کریر۔اوڑان گڈ اود باقاعدہ دژمن نا برخلاف مزاحمت نا بناء ئے کرے

میجر گہرام بلوچ