بلوچستان لبریشن فرنٹ نا جارکش میجر گہرام بلوچ تینا شینک کروکا درشان ئٹی تدوکا دے سیٹلائیٹ ٹاؤن، کوئٹہ آن ماہل بلوچ پنی ءُ بلوچ زالبول ئسینا دزگیری و پدا اونا بر خلاف سی ٹی ڈی نا نیمہ آن دروغ ءُ مقدمہ نوشتہ کننگ و اودے بی ایل ایف نا فدائی پاننگ نا زی آ پاریر نہ شرفمَنْد آ ماہل بلوچ بی ایل ایف نا سرمچار ئسے نہ اود فدائی ئسے۔ ہندی بندغ آتا حوال ہلنگ آن دا خبر تمانے کہ ماہل بلوچ گومازی نا کوچہ، مَکُّران نا پنی آ راج دوست ہستی خدا مُرزی واجہ محمد حیسن نا چُنا نا اُرائی و ہیومن رائیٹس کونسل، بلوچستان نا چیئرپرسن بی بی گل نا نشار ءِ ۔ خواجہ محمد حسین و بی بی گُل نا سْیاسی کاریمک ریاست ءِ ہضم مننگ الوسُر گڑا اوفک ایف سی و آرمی نا بندغ آک ہڑدے اوفتا اُراغا سُمکاری کریرہ و چھاپہ خلکُرہ۔ پدا 2018 ٹی اوفتا اُراتے فوج ہُشا اوکان پد اوفتا خاہوت ہنپیسہ شال آ بس ہراڑے ماہل تینا تاتہ و دُسخینچ آ تیتو اسک و تینا اِرٹنگا مسڑتے خوانیفیکہ۔
سی ٹی ڈی نا کارندہ آتے داخس ہمت و جُرت اف کہ اوفک بی ایل ایف نا سرمچار ئسے دزگیر کیر۔ سی ٹی ڈی نا پِن کشنگ فوج و اونا ڈکھوک ایجنسی تا دو آن جبر ئٹ بیگواہ مروکا بلوچ فرزند آتے دروغ ئنا انکاؤنٹر تیٹی خلنگ یا دروغ مقدمہ کریسہ دروغی ءُ کاروائی تیٹی اوفتا دزگیری تے پاش کننگ ءِ ۔ قوضہ مروکا بلوچستان نا کٹھ پتلی حکومت نا وڑ سی ٹی ڈی ہم فوج و اونا ڈکھوک ایجنسی تا اسہ بشخ ئسے ہرانا دو آن اوفک تینا بیدس عدالت آن کاروائی تے قانون نا پوشاک ءِ بینفنگ و تینا کُل خازگ آتے سی ٹی ڈی نا مون آ شاغیرہ۔
اوفک تینا درشان نا ایسر ئٹ پاریر بی ایل ایف نہ دہشتگرد تنظیم ئسے نہ بی ایل ایف توں سْیالی میار ئسے۔ بلوچستان لبریشن فرنٹ پاکستان نا جبرئٹ قوضہ نا بر خلاف بلوچستان نا آجوئی کن جہد کروکو اسہ راج دوست تنظیم ئسے ہرا پاکستانی دہشتگردی نا برخلاف سلاء بند مزاحمت کرسہ پاکستان نا نو آبادیاتی قوضہ، جبر لوٹ ءُ پُل آتا بر خلاف اسہ جائز و قانونی جنگ اس کننگے۔ واہم شرفمَنْد آ ماہل بلوچ نا بی ایل ایف تون ہچو سْیالی اس اف دا رد ئٹ سی ٹی ڈی نا دعوی دروغ و بد نیتی ئسے۔ ماہل بلوچ نا دزگیری بلوچ زالبول آتے خُلیفنگ، خاص اوفتا خاہوت آتے اوفتا سْیاسی نظریہ کن سزا تننگ نا اسہ کوشست اس مننگ کیک۔
