بلوچ لبریشن آرمی نا جارکش جئیند بلوچ تینا شنگ کروکا بیان ئٹی پارے کہ ننا سرمچار آک قلات ئٹی اِرا جتاؤ جلہو ئٹی دشمن نا اسہ کمک کار ئسے تون اوار کوزہ گیر پاکستانی لشکر نا اِرا کارندہ ءِ کھسفیر۔
او پارے کہ بی ایل اے نا سرمچار آک اِرا دے مُست قلات ئٹی شور پارود آن خڑک دشت گوران نا علاقہ ٹی کوزہ گیر پاکستانی لشکر و ڈھکوک ادارہ تا جوڑ کروکا ڈیتھ اسکواڈ نا اہم کمک کار زمان خان ءِ جلہو ئٹی ٹک کریر ہراٹی او جاگہ آ کھسک۔
اونا پاننگ اسّ کہ زمان خان تدوکا بھلو وخت ئسے آن شورپارود ئٹی دشمن لشکر کن اسہ کمک کار ئسے نا وڑ کاریم کننگ اس۔ او مئی 2019 ئٹی شور پارود ئٹی بی ایل اے نا سنگت ماما شمس پرکانی بلوچ، ڈاکٹر شعیب بلوچ و سنگت تنظیم بی ایل ایف نا باسک ظفر محمد حسنی و مئی 2020 ٹی بی ایل اے نا سرمچار شہداد بلوچ و احسان بلوچ نا شہادت ٹی پاکستانی لشکر و ڈیتھ اسکواڈ تون اوار تُد اس۔
او ودیک پارے کہ داکان بیدس پن کروک کارندہ شور پارود ٹی بلوچ جہد کار آتا کسر تا پیدواری، ڈیتھ اسکواڈ کارندہ تے ٹھکانہ تننگ ئٹ اوار اس۔ قومی غداری کننگ آ زمان خان ءِ سرمچار آک اونا انجام اسکان سر کریر و دا ٹولی آن تعلقداری تخوکا ہم زمان خان نا ڈول تینا انجام ءِ سر کننگور۔
او پارے کہ ایلو نیمغان بلوچ لبریشن آرمی نا سرمچار آک قلات شار ئٹ اسہ پین جلہو اسیٹی کوزہ گیر پاکستانی لشکر نا بنجائی کیمپ ئنا رکھوکا چوکی ءِ تدوکا نن ٹک کریر۔ سرمچار آک گرنیڈ لانچر و ایلو خودکار سلاہ تیٹ دشمن کارندہ تے ہمو وخت ٹک کریر ہرا وخت چوکی آ پنچ کارندہ مُچ اسر۔ جلہو نا بھرم ٹی کم از کم اِرا دشمن کارندہ جاگہ آ کھسکر۔
اونا پاننگ اس کہ بلوچ لبریشن آرمی پن کروک تومکا جلہو تا ذمہ واری ءِ ہرفک و دا قول کیک کہ مسخت نا دوئی مننگ اسکان ننا جلہوک برجاء مرور۔
