ریڈیو زْرمبش بلوچی | ریڈیو زْرمبش بلوچی,اتیکہ

زبان ءِ دیمروی ءَ بلوچی کارٹون ءِ بستار

زبان ءِ دیمروی ءَ بلوچی کارٹون ءِ بستار

AUG

26
26 / 08 / 2020 نبشتانک 120

انچوشکہ بنی آدم چَہ وتی مات ءَ راجی زبان دربارت پمیشکا ھر راجی زبان ماتی زبان ھم گْوشگ بیت ءُ پد ءَ ھر آجوئیں راج وتی راجی زباناں سرکاری درجگ دے اَنت، بزاں یک آپیشلی اسٹیٹسے اش دے انت کہ ھمے زبان ماں وانگجاہ، دربرجاہ ءُ مزن شاھدربرجاھاں وانینگ بنت ءُ کارگس ءُ کارجاھاں ھم کارمرز اش روا بیت، چریشی ءَ وتواجہ ءُ آجوئیں راجانی پدریچ وتی زبان ءِ وانگ ءُ نبیسّگ ءَ ھیل بنت ءُ زبان ئِے ھم دیمروی کن انت۔
ایشی ءَ ابید ھمے زبان توری ھر وڑیں سرکاری کارجاہ ءُ کارگِس بہ بنت یا توری پرائیویٹی ترامگیج ءُ پٹ ءُ پولی سنٹر بہ بنت اود ءَ ھم کارمرز بیت، پد ءَ راج ءِ لس مھلوک ھمُک روچ گوں روتاک، ھالتاک، ماھتاک ءُ گِندگُش وڑیں آسراتیاں وتی زبان ءِ وانگ ءُ زانگ ءَ گلائیش بنت۔ چَہ ایشی ءَ گیشتریں کار ایش انت کہ آجوئیں سرکار زبان ءِ دیمرئی دیوکیں ھر گل ءِ زری کُمک کنت۔ چوناھیگا پہ زبان ءِ دیمروی ءَ واست ءَ مستریں گام ایش انت کہ ماں وانگجاھاں راجی زبان راج ءِ زھگاں وانینگ بہ بیت کہ راج وتی جِند ءِ زبان ءَ گوں مھکمیں ھاٹیگے ءَ زندگ بہ دار ایت ءُ کش ءُ کِرّ ءِ زورآوریں زبان تئی زبان ءَ تاوان مہ دنت گُڑا پہ زھگانی شَریں وڑے ءَ وانینگ ءَ سرکار وشیں اَکسی کتاباں اڈ کنت کہ گوں اَکسانی چارگ ءَ زھگ پیسر ءَ چیزانی نام ءَ ماں وتی زبان ءَ بہ زان اَنت۔ پد ءَ ماں آجوئیں ملک ءَ ازمکار ءُ تامُری ترامگیج وتی زبانی دیمروی ءِ واست ءَ کارٹون ھم ٹھین اَنت کہ زھگ مسکرائی کارٹونان بہ چار انت ءُ زبان ءَ دربر اَنت۔


البت چَہ بلوچ ءَ گیشتِر کس نہ زانت کہ پہ زیردستیں راجانی زبان ءِ دیمرئی ءِ واست ءَ ھمے وڑیں آسراتی نہ بنت کہ آجو ءُ وتواجھیں راجاں بنت بلکیں چَہ درستاں پیش زیردستیں راج ءِ زھگ ءُ پدریچ چَہ آئی ءِ زبان ءِ دِیر دارگ بنت ءُ ماں وانگجاہ، شاھدربرجاہ ءُ مزن شاھدربرجاھاں گلامیں راج ءِ زھگ چَہ وتی زبان ءِ وانگ ءُ نبیسّگ ءَ زبھر بنت ءُ گلامیں راج ءِ دیم ءَ زورانسر ءِ ھاٹیگیں زبان ءِ روتاک، ھالتاک، تندجاہ، گِندگُشی تامُر بنت ءُ پد ءَ ھاٹیگیں زبان ھمے گلامیں راج ءِ سر ءَ انچو سان مند بیت کہ گلامیں راج ءِ دیم ءَ آئی جِند ءِ راجی زبان ھچ بستارے ءُ ارزِشتے نہ دار ایت۔ نودربر گوں شوک ءَ زورانسر ءِ زبان وان انت، چریشی ءَ راج ماں گپتاری ءَ وتی راجی زبان ءِ کْوھن ءُ زگریں گالاں ڈالچار کنان ءَ زورانسر ءِ گالاں زُور ایت پد ءَ کم کم ءَ وتی زبان ءِ بیگواھی ءَ گوں وتی چَمّاں گِند اَنت انچوشکہ اے کھر ءُ زوراکی ءَ مرچیگیں زمانگ ءَ ما بلوچ ءَ گِندگ ءَ ایں کہ مئے سر ءَ انت۔
بلوچ گیدی ءِ ھما بدبھتیں راج انت کہ چَہ دھکاں ماں وتی گلامی ءَ زورانسر ءِ زبان ءِ وانگ ءُ نبیسّگ ءَ بہ واس انت پمیشکا مرچی بلوچ راج ءِ لس مھلوک ماں بلوچی گُپتاری ءَ وتی راجی زبان ءِ زگریں گالاں ڈالچار کنت ءُ ھندی ءُ پارسی ءِ گالاں زور ایت ءُ بلوچ گُپتاری ءَ ھوار کنت۔ اے بلوچ راج ءُ بلوچی زبان ءِ بلاھیں تاوان ءُ بیرانی یے کہ مئے چمانی دیم ءَ انت بلے ما انچو بے سُدّ ءُ بے سما انت کہ ما ھچ نہ گْوش ایں چی ءَ کہ ما مجگی گلام ایں۔
باید انت بلوچ راج نی پاد بئیت ءُ چیزے بہ جیڑ ایت ءُ اے وڑیں بیرانیانی توجیلّے در بگیج ایت۔ چوناھیگا اے بدیں راستی یے کہ ما بلوچ گلام ایں پمیشکا پہ مئے زبان ءِ دیمرئی ءَ ھچ وڑیں آسراتی وَ نیست البت مارا اے ھم منّگ لوٹ ایت کہ ھر اڑ ءُ جنجال ءِ توجیلّ ھُدا وت دنت اگاں بنی آدم وتی اگل ءَ کمیں سُرین ایت چی ءَ کُران ءَ ھم نبشتہ انت " پْراھگ ءِ چَہ درستاں جْوانتریں مھلوک بنی آدم انت" پمیشکا باید انت ما بلوچ نودربر ءُ اُستاد، پیر ءُ ورناہ ءُ ھر وڑیں وانندگیں بلوچ وتی گوانکواں بلوچی ابینکدار(کیبورڈ) ءُ بزانت ءَ ایرگیج بہ کن این ءُ وتی دزھُورکی ءَ راجی زبان ءَ بہ وان ایں انچوشکہ مرچی پہ زبان ءِ وانگ ءُ نبیسّگ ءَ پیسبُگ، وٹس ایپ ءُ ھال ءُ اھوالانی تندجاہ بلاھیں آسراتی انت پمیشکا باید انت ما وتی دزھُورکی ءِ وھد ءَ بلوچی ءَ بہ وان ایں ءُ راجی زبان ءِ وانگ ءُ دبرگ ءَ راج ءَ سکین بہ دے ایں۔


گڈسری من یک کسانیں سرگْوستے گْوش آں کہ دو روچ پیسر من پہ کارے ءَ وتی ھمساھِگیں دزگْوھارے ءِ گِس ءَ شُت آں گُڑا دْروت ءُ دْراھبات ءَ رند ما گپ ءُ توار ءَ گلائیش ات ایں کہ کسانیں زھگ ئِے گریوان ءَ وتی مات ءِ کِرّ ءَ آتک کہ من ءَ لالا ءَ شھماتے جتگ گُڑا دزگْوھار ءَ پہ چُک ءِ گلائیش کنگ ءَ وتی گوانکو کشت ءُ ھندی ءِ کارٹونی تامُرے پچ کت ءُ داتگ ئِے کہ وش بہ بیت کہ مارا تکانسر مہ کنت۔ گُڑا من ءَ مار اِت کہ یکے وَ مئے زھگاں ماں وانگجاھاں ھندی وان اَنت، پد ءَ گِندگُشاں ھم تھنا ھندی ءِ کسمانک، ھال ءُ اھوال بنت پد ءَ مئے زھگ گِساں ھم ھندی ءِ کارٹوناں چار اَنت گُڑا مئے راجی زبان ڈالچار وَ بیت۔ چَہ اے ندارگ ءَ من باز تکانسر بوتگ ءُ من چَہ دزگْوھار جُست کُت "زاناں یوٹوب ءَ بلوچی کارٹون نیست اَت کہ تو ایرگیج بہ کتین ءُ ببرک ءَ زھگ ءَ بہ داتیں؟"
گوں پشلیں توارے ءَ دْرائینت ءُ گْوشت ئِے " منی دزگْوھار من سَک باز پٹ ءُ ھُنڈ کت بلے من ءَ وشیں بلوچی کارٹون ھچ دز نہ کپت البت لھتیں ھست اِت انت کہ آیاں زگریں بلوچی توار مان نیست اَت بلکیں گیشتر سندھی ءُ کمیں بلوچی ئےِ ھست انت پد ءَ ھم من ءَ انگت وش نہ بیتگ اَنت"
وھدیکہ من وتی لوگ ءَ آتک آں گُڑا من چہ یوٹوب ءَ بلوچی کارٹون شوھاز کت بلے من ءَ ھم شَریں کارٹون گندگ ءَ نیاتک۔ من وتی بلوچ راجی زبان ءِ تامُر ٹھینوکیں ازمکار ءُ ڈبنگ ءِ کارنوکاں دزبندی کن آں کہ پہ راجی زبان ءِ ھزمت ءَ گوں بلوچی ءِ زگریں تواراں لھتیں بلوچی کارٹون ساڑی بہ کن انت کہ بلوچ راج ءِ پت ءُ مات وتی گوانکوانی تہ ءَ ایشاں ایرگیج بہ کن انت ءُ بلوچ زھگ ھم ایشاں بہ چار انت، چی کہ کارٹون زھگانی جیڑگی بودی ءَ گیشتِر کنت، انسان ءَ ماں توارکش ءَ آگاہ کنت ءَ پد ءَ زبان ءِ زگری ءَ ھم باز کُمک کنت۔ من اُمیت کن آں کہ زبان دوستاں منی اے کلوہ سر بیت ءُ پہ راجی زبان ءِ دیمروی ءِ واست ءَ گوں بلوچی ءِ زگریں گالاں ڈبنگیں بلوچی کارٹون شوشل میڈیا کاینت۔


بلوچ راج ءِ تہ ءَ راجی زبان ءِ وانگ ءُ نبیسّگ ءِ آشوبے ودی بہ بات ءُ بلوچی دیمروی کنات۔ شالا انچوش بات