ریڈیو زْرمبش بلوچی | ریڈیو زْرمبش بلوچی,آبدآسکانی

سیچن ء یک کار | نبشتہ کار : آبد آسکانی

سیچن ء یک کار | نبشتہ کار : آبد آسکانی

SEP

07
07 / 09 / 2020 نبشتانک 109

یک برے من ءَ منی مهربانیں مات ءَ گْوشت: منچک! مئے دار کٹ اِتگ اَنت اے بنڈ کہ لوگ ءِ دپ ءَ ایر اِنت تَل ئِے بہ کن۔من دیست کہ چہ منی واک ءُ وس ءَ ڈن اِنت. من هج بر بنڈ تل نہ کتگ۔ گنتر تپر ءَ وتی ٹانگ ءَ جن آں. پد ءَ تَپر هم آلامتیں تپرے۔یک بلائیں کنٹ برے کہ گوں من نہ چست کنگ بیت نا ایر کنگ۔ گڑا من گْوشت منی ماتل! اے کنٹ گوں من تل کنگ نہ بیت۔ مهم جان (منی کستریں بْرات) ءَ بہ گْوش هما ئِے تَل کنت۔


دگہ روچے مئے کپسول کٹ اِت مات ءَ گْوشت بیلُک ! مئے کپسول کٹ اِتگ۔ ایشی ءِ جاگہ ءَ آ دگر ءَ بہ بند۔ من دیست من هج بر اے کار نہ کتگ نے کہ ایشی ءِ سر ءُ ساز ءَ زان آں۔ اے هنرے ایشی ءَ منی سر در نہ روت گنتر وتی جند ءَ ماندار آں۔ گڑا همساهگیں جنینے ءَ اے مشکل آسان کت۔


یک برے مئے گْور ءَ لهتے مهمان آتک مات ءَ گْوشت : منی چُک! مهمانانی ناهاریگ اَڈ کنگیگ اِنت۔ وتی لوگ ءِ دپ ءِ مرگ ءَ کش ایں شرتر اِنت۔ اچا مہ دار! کارچ ءَ بہ زیر بہ کش ئِے کہ بے وهد اِنت۔من گْوشت ماتی! تو وت زان ئے کہ من وتی زند ءَ دنیگا هچ ساهدارے ءِ ساه نہ گپتگ من ءَ بزگ بیت۔ من دگرے پرمایاں کش ایت ئِے من مولک پرمات۔ آ گنده بچک ءَ هما دمان ءَ هلار کت۔ ککڑ ءِ سَرگ سر اِت ءُ دو گام جاه ءَ کَپت۔


همے پیم ءَ دگہ رندے من ءَ یات اِنت کہ منی مهربانیں مات اد ءَ نہ اَت۔ ترپشیں شیر من ءَ ایدوگ کنگیگ اَت اَنت چوشیں مردمے نیست اَت کہ مئے پس ءَ بہ دوش ایت ءُ من ءَ بہ دنت گڑا من وتی همساهگ ءِ جنک مهتی ملک گْوشت کہ پس ءَ من ءَ بہ دوش ایت ءُ بہ دنت۔ گوں منی اے گپّ ءَ مهتی شت پہ کندگ ءَ۔ من اجکہ ءُ هیران بوت آں کہ چہ گپّے۔ من ءَ گْوشت ئِے: واجہ! تو بلائیں مردمے ئے پسی دست چیر کنگ ءُ پچل کنگے ! هم نہ زان ئے. هما کتره ءَ من ءَ ئِے دشت ءُ دات۔


یک برے شهمیر ءِ مات ءَ گْوشت کہ بی بی لال بی بی مئے گندکاں آتکگ ءُ اِے سالی هامین ءَ گون کَپتگ۔ هامین وَ "بش ءُ بنبر" ءَ وتی هرجان جَت بلے "وژنا شیپ" ءِ مچ جوڑ اَنت یکے گهتر کن ءُ بر ءُ بہ یار بلے پوگسیں ناه بہ بہ اَنت ۔لال بی بی هورکیں دستاں کراچی ءَ مہ روت، ٹیکی یے گون ئِے بہ بیت۔


من گوں شهمیر ءِ مات ءَ گْوشت کہ گپ تئی راست اَنت بلے من مَچ توانے نے آں وتی زند ءَ مچے ءَ سر نہ کپتگ آں گنتر کپ آں ءُ سْرینوں دوگچل بیت تو دگرے بہ گوش۔ گوں ترندیں گالوارے ءَ من ءَ ئِے گْوشت شما وتی دل ءَ نامداریں شائر اِت ، نَدکار اِت ، وکیل اِت ، زانتکار اِت ، مچے ءَ لک دات نہ کن اِت. دو دانگ کلونٹ چت ءُ وارت نہ کن اِت شمئے سر اگاں مساپری یے بہ کپ ایت ، گڑا شما چون کن اِت۔ شمئے شهزانتی ءَ چے گْوشت؟ مردم پهک پهک ءَ "سیچن ء یک کار" هم مہ بیت۔ چوشیں نابود ءُ ننویں مردم هم شر نہ اِنت۔
من دیست شهمیر ءِ مات ءِ هبر رد نہ اَنت. ما هچ نہ زان ایں شهدک یک چرسی موالی یے. بلے هرچ کارے ءَ بلد اِنت۔ من اِش کتگ گد هم دوچ ایت۔


همے دَرگت ءَ من وتی مهربانیں مات ءِ ترانگ ءَ کپت آں۔ آئی ءَ هم زانتگ اَت کہ منی چک سیچن ء یک کارے بلے ترندین ءُ داگ نالیں هبر ئِے من ءَ نہ گْوشتگ اَت۔ هو ماتل! تئی مٹ ماں جهان ءَ نیست اے گْواچنیں گپے کہ ما ندکار ءُ لچہ کار سیچن ء یک کار هم نہ ایں ودلیں ندکار ءُ ودلیں لچہ کار ایں دنیا ما را پوڑے هم نہ لیک ایت۔ یک برے من ءَ یات اِنت یک چرسی یے ءَ (باریں چرس ئِے کُٹ اِتگ اَت اَنت چتور) منی سَر ءَ زهر گپت ءُ گْوشت ئِے کہ تئی بستار چی اِنت ، تو کئی پت ءِ شائر ئے ؟ تو کہ دنیا ءِ دگہ هچ کارے نہ زان ئے گڑا تو وتی دل ءَ جزم بزاں کہ تو هچے نہ ئے!!!